Skip to main content

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

Remnani Champhaiah

REMNANI CHAMPHAIAH :
Nimin khan MZP HQRS Champhai buatsaihin
Champhaiah Remna Ni vawi 33-na pualin hun hman TJ Lalnuntluanga, Transport Minister chuan khuallian niin a hmánpui.
Remna Ni vawi 33-na puala Gov't Champhai College Multipurpose Hall- a hun hmanah hian Khuallian TJ Lalnuntluanga chuan Mizote chu mahnia ro inrel hran thin kan nih thu leh India rama kan awm ngai loh thu sawiin, 'British sawrkarin India a chhuahsan rualin India chu Mizoramah an barhluihna avangin Mizoram chu India ramah a awm zui ta a ni, a ti. Kum 1950-1960 chhung khan India hnam nihphung, nationalism leh Culture in Mizote min run a, vai thawmhnaw thlengin kan inbel a. Mizo hnamzia dah hniam ching te an lo awm ta hial a. Mizo hnam thinlung pute lo chhuakin India rama awm luih tir an nih an duh loh avangte leh Assam leh India sawrkarin Mizoram a ngaihsak loh avangin India nen an thu a inhmu ta lo va. Zalenna sual a lo ni ta a, Mizoramin zalenna a sual chu India in helah a puang zui ta a ni, a ti.  
Mizoram chu rambuai, tahna hmun a nih tak
avangin Kohhran hruaitute leh NGO hrang hrangte chuan Hnam sipai te ngenin inremna a awm theihna turin hma la-in India sawrkar an be ta a. Hnam sipaite chuan mipui tawrhnate ngaihtuah chungin an beih ber mipuite'n inremna an pawm ta a ni, a ti a. He remna avanga Mizote lawm rualna ni hi a la awm ngailo a ti bawk.  TJ Lalnuntluanga chuan, Mizote dinhmun leh Mizote hi mahnia ro inrel thin kan ni tih hre lo tam tak an awm tih a sawi a.  Vai nationalism kengtute'n zalenna sual kha kan chanvo a ni tih an hre duh lo va, zalenna sual lo anga kan hnam sipaite an sawi thin leh zalenna sual avangin
ram a chhiat phah nia an sawi thin te hi a pawi takzet a ni, a ti. Zalenna sual avangin Mizote hi ram leh hnam angin khawvel hriatah pholan a ni a, hmasawnna tam tak Zoramah a lo kal phah a ni, a ti bawk.
India leh Mizoramin inremna a neih chu khawvela inremna tha ber a nih thu sawiin, hun thim åtanga zalenna kan nei thei hi a hlu tak zet a ni, a ti a Remna hi Pathian min pek a ni a, he inremna hi a hlu a, remna hi a ropui em avangin a hlut zia hria a
chhawmnun zel hi a pawimawhin a Pathian thu em ni, a ti bawk. TJ Lalnuntluanga chuan Hnam movement hotu te, Hnam sipaite chu a chhuan thu leh zahna chibai a buk a ni tih a sawi a. Remna siamna kawnga hmalatu zawng zawngte chungah lawmthu sawiin, Remna leh muanna vawnhim a nih zel theihna atana ngaihdamna thinlung nen Remna Ni Champha vawi 33-na hmang turin mipui a sawm bawk. Remna Ni puala hun hmanah hian MNF, MPCC, ZPM, PRISM Party aiawhte leh PAMRA aiawhte atangin mi pakhat theuhin thu an sawi bawk a, hnam tana nunna hlantute sun an ni bawk. 
He hunah hian MZU-in Under Graduate Result a tihchhuaha Gov't Champhai College atanga Top 10 a lang mi 3 te hnenah chawimawina  thilpek hlan a ni bawk. 
Remna Ni puala Champhai-a hun hman hi Lalrammawia Tlau, Vice President, MZP Hqrs Champhai chuan kaihhruaiin, H.Lalramhluna, President MZP Hqrs Champhai hnen atangin thusawi ngaihthlak a ni bawk



Comments