Skip to main content

ONLINE APPLICATION CHUNGCHANG ZIRHO

ONLINE APPLICATION CHUNGCHANG ZIRHO : Nimin khan DEO hnuaia zirna in hrang hranga zirtir tute tan Scheme thar Online Application of Scholarship Scheme chungchang Govt Champhai College Multipurpose Hall-ah zirho a ni. Pu P. Lalhmingliana, Principal, Govt. Champhai College chuan tun hma chuan scholarship ti turin awlsam takin a tih theih mai thin a, khawvel changkang zelah tunlaiah chuan tun hma ang mai maia tih theih a ni tawh lova, Online-a Scholarship form dah khah a ngaih tawh avangin Computer leh Online a tih theih hrang hrang te hi kan thiam a ngai a ni a ti a, la hmang thiam lo te pawh intuaihriam zel a, Internet hmanga tih theih hrang hrang te hi thiam vek tum turin zirtirtu kalkhawm te chu a chah a, mi inzir peih te tan thiam theih loh hi a awm tak tak lova, kum upa lam tawh tan pawh zir peih phawt chuan thiam theih a nih thu sawiin Seminar chu a hawng a ni. Mizoram Scholarship Board Secretary Pu JH. Zoremthanga chuan, Scholarship chu naupang harsa zawkte tanpuina anih avangin …

RUAH SUR AVANGA HARSATNA THLENG

RUAH SUR AVANGA HARSATNA THLENG :
Inrinni zan dar 8:00 vela ruah bawhawk sur
vanga lei tawlhin Champhai khawpui chhung inkalpawhna kawng thenkhat hnawhpin bakah chhungkaw pahnih inchhung bungrua senghawi a niin, Champhai leilet zawl buhhmun thenkhat a chimpil bawk.
Inrinni zana darkar hnih zet ruah bawhawk sur vang khan Champhai District Hospital panna kawng thuang hnih chu leitawlhin a hnawhping ve ve a, hemi zan vek hian kawngpui pakhat zawka leihnawhpin hmun hnih chu lirthei kal theihin sialtlang nghal a niin, kawng chung zawk pawh hi nimin tlai lam khan lirthei kal theiha thenfai a ni bawk.
Champhai Vengsanga Pu H. Vanlalhmuaka te In chu chunglam leitawlhin hrutin, leitawlh hian an kawmchar lam bang a nek chhia a. Inchhung bungruate senghawi felsak a niin, nimin khan veng chhung mitlawmngaiten in chhelai thawmthat hnatlang an nei nghal a. Champhai Vengsanga Pu F. Lalsangpuiate In hnuai lungrem chimin, ban thenkhat a hnawl-bun vangin inchhung bungrua chu nimin zing khan hnatlanga senghawi a ni a, in hi luahzui ngam a nih loh thu in neitupa hnen atang hian dawn a ni.
Champhai khawpui chhung, Aizawl panna kawng chu kawngko leitawlhin hmun hnihah a hnawh ping a, Inrinni zan vek khan lirthei kal theihin thenfai leh nghal a ni. Khawpui chhung kawngko leitawlh a awm nual bawk a. Champhai Bethel Venga kawngko leitawlhin kawngpui sira lirthei pahnih chu a delh a. Inrinni zan vek khan lirthei te hi lakchhuah niin, vanneihthlak takin a chhe lutuk lo hlauh.
Inrinni zana ruah bawhawk sur avang hian
Champhai leilet zawl bial chhunga Sangha khawi a chhuak nasa hle a. Leilet zawl, Zote lampang Tuipui lui kama leilet buh chu tuiin a chimpil deuh vek bawk.
Thu dawn danin nimin zing lam dar 2:00 vel khan Champhai lam pana kal, Champhai Kanan Venga Pu Biakliana Truck, a fapa Laldinsanga khalh chu Tuirini kamah chesualin, kawng thlangaha lum a. A khalhtu Laldinsanga hi a hliam vangin Aizawl
lam panpui a ni.



Comments