Skip to main content

Posts

Showing posts from June 27, 2019

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

Ruihhlo Rs. 7,597,000 man hal ral

Khawvel hmundang rualin nimin khan Champhai District Court tualah 'International Day against Drug Abuse and Illicit Trafficking' pualin Champhai District chhunga Mizoram Police in kum 2015-2018 chhunga ruihhlo an man, Court-in ND & PS dan hmanga a chinfel tawhte chu Additional Sessions and Special Judge R.Vanlalena'n a halral. Champhai District Drugs Disposal Committee Chairman, Superintendent of Police (SP) Rex Zarzoliana Vanchhawng chuan Champhai District chu ruihhlo luhna kawngkapui a nih vangin, chhungtin min runchhe mektu ruihhlo dolet tur hian mi zawng zawng tanrual a tul thu leh he ruihhlo halral hun hmangtu sorkar mi pawimawh tak takte leh Media mite pawhin ruihhlo doletna kawngah theihtawp chhuah turin mawh kan phur a ni, a ti a. Nimina halral tak Heroin Kg 2.356 (Hawng 178) tualchhung hralhnaa chhut a, Rs. 70,80,000  man leh Ganja Kg 127, man tualchhung hralhnaa chhuta Rs. 5,17,000 man chu kum 2015-2018 chhunga man a nih tih a tarlang a. Champhai SP Rex Zarz…

Kohhran , KṬP & Kohhran Hmeichhia ten Jubilee lawm

Khawzawl Electric Veng Presbyterian Kohhran in an Kohhran kum 25 tlin, Silver Jubilee lawmna, kar kalta Inrinni atanga an neih chu nizan hmasa khan a tiak. Inrinni khan Kohhran Hmeichhe Silver Jubilee puala hun hman a nih hnuah Thawhtanni khan KTP Silver Jubilee puala hun hman leh niin, niminpiah khan Kohhran Silver Jubilee lawm leh a ni a. Inrinni-ah ruai thehin, Thawhtanni khan Vawk leh Ar nen ruai an theh leh a, niminpiah tlai khan nawn leh a ni. Thawhlehni chawhma khan Biak In kawtah Silver Jubilee lawmna dar vua in Khawzawl khawpui chhunga Pastor, Bialtu Pastor lo ni tawh thenkhat leh Kohhran Puipa ten dar vawi 25 an vua a, hemi hnu hian Bialtu Pastor Rev. F. Lalsangkunga'n Jubilee Lungphun a hawng a. Rev. Lalrammawia, Chaplain, Falkawn Referral Hospital in Silver Jubilee Hall a hawng leh a ni. Hemi hnu hian Biak In lamah hun hmang zui nghalin, Kohhran zaipawlte an zai bakah Upa Lalthanliana'n Kohhran report a pe a, Rev. Lalrammawia'n thuchah a sawi a ni. Chawhnu lam…

ZU RIM NAM CHUNGA MOTOR KHALH MAN DAWN

Champhai SDPO C.Lalsawta chuan lirthei chungchanga mipui hriat tura Champhai Police te hmalakna thuchhuah siamin a tarlang. A thuchhuahah chuan zu rui emaw zu rim nam chunga lirthei khalh hi chetsualna tam tak thlentu a nih avangin Champhai khawpui chhungah rui chunga lirthei khalh thinte dap chhuah hna kalpui a, hetiang mi man an nih chuan na taka hrem a nih theih nan Champhai Police chuan hma a la dawn a, case siamsak zel an nih tawh tur thu a sawi a. Lirthei khalhtute zawng zawng zu rui emaw zu rim nam zawng zawng zu rui emaw zu rim nam chunga an lirtheite khalhchhuak lo turin a ngen nghal bawk.  Hei bakah hian Two wheeler exhaust ri ring chi vuah a, zan rei tak taka bengchheng taka tlan thinte vai turin hmalak a ni dawn bawk. Myanmar atanga lirthei lakluh, Kenbo 125 chu registration nei lo leh register theih loh anitih tarlangin, hetiang hi town area chhunga tlan hmuh a nih chuan

man zel turin hmalak a ni dawn a. Mipui fimkhur a, dan zawm turin a chah a ni.

Lawrkhawm

UNDER 16 FOOTBALL TOURNAMENT : T. Khupzachin U-16 Football Tournament chu nimin khan a ni hnihna khelh chhunzawm leh a ni. Nimin khan Match 4 awmin, Kanan FC chuan Zokhawthar FC chu 2-1 in an hneh a. Venglai FC chuan Selam FC chu 4-1 a hnehin,  Vengthlang  chuan Melbuk FC chu 11-0 in an hneh a, Kahrawt FC leh Tlangsam FC chu 1-1 in an in draw,ve thung. Vawiin inkhel tur leh an khelh dan tur indawt chu:- Electric vs Zokhawthar New Champhai vs Selam Vengthar FC vs Melbuk Zion Veng vs Tlangsam
TAXI  STAND : Presbyterian Kohhran Biak in, Zotlang ram chhunga Upa Vanlalrova Building ep kawngpui metres 10 leh metres 26-a thui chu kawngpui vang tan zawnga Taxi 11 din theihna turin Temporary Taxi Stand atan  Champhai SP Rex Zarzoliana Vanchhawng  chuan a puang.
TUIALHTHEI Mizofed Pump MS : Khawlchhia HSD : Free Sale RC Filling Station MS : Nil HSD : Nil RD Filling Station MS : Free Sale  HSD : Free Sale