Skip to main content

Posts

Showing posts from July 5, 2019

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

SP in a hmalak dan tur MJA hrilh

SP IN A HMALAK DAN TUR MJA HRILH : Nimin khan Champhai District Superintendent of Police Rex Zarzoliana Vanchhawng, MPS chuan a pisa-ah MJA Champhai District member-te chu thingpui inpuiin, inkhawm hona a neihpui. He hunah hian Champhai SP Rex Zarzoliana Vanchhawng chuan mipui rawngbawl kawngah police leh media te tanho a tul thu a sawi a. Police te hian hna an ngahin dan leh thupek kenkawh kawngah thawh sen loh a awm a, a bikin Champhaiah chuan chona a tam lehzual nia a hriat thu a sawi a. Hmalakna tur langsar zual nia a hriatte sawiin, Champhai chu ramri dep a nilh angin ruihhlo luhka a ni a, ruihhlo donaah beihpui thlak a, tha thlah lo va bei tura ruahmanna siam mek a ni a; awmze nei zawk leh sawt zawka kalpui dan tur pawh duan a ni, ti a. Ruihhlo ngaite enkawlna tur pàwh tlawmngai pawl leh khawtlang tangruala buaipui dan dap a tum thu a sawi tel bawk. Champhaia lirthei pung zelah traffic tawt avanga harsatna thleng chho zel tur veng a, tun aia awmze nei zawka lirthei chet velna pa…

BETHEL VENG ENG

BETHEL VENG ENG : Nizan hmasa khan Champhai Bethel Veng mipuiten an thawhkhawm atanga veng chhung hmun hrang hrang ti engtu tur Mini High Mast an siamte chu Transport Minister TJ Lalnuntluanga, Champhai South bialtu MLA ni bawk chuan chhawr tangkai theih turin a sum tlangzarh. Minister chuan thu sawiin, suahsualna zalen hun, zan thimtham venna tur leh mipui te thlamuang taka an awm theihna tura khawtlang tangrualin veng chhung hmun thenkhatah eng tha tak an pe chhuak thei chu lawmawm a tih thu a sawi a. Mihringte nunphungah eng hi a pawimawh em em a, High Mast chu khawpui thang leh changkang zel mamawh a ni tih hria-in Champhai Town Planning leh Master Plan siamahte ngaipawimawha ni, a ti a. Changkanna leh hmasawnna ken tel suahsualna pung zelah sual zalen hun zan khawthim umbo turin veng chhung tih en chhuah vek a tul tawh thu a sawi a.  Bethel khawtlang tangrualin Sawrkar pawt buailo a eng tha tak leh veng chhung hnawmhnawk paih tur Lirthei tha tak a sual chhuak thei chuan veng mipu…

Kum 10 chhunga ruahtui tlak tlem ber

KUM 10 CHHUNG A RUAHTUI TLAK TLEM BER : Ruahtui tla zat June thla chhung khan Champhai in ruahtui mm 221.5 a dawng. June thla kha kumin chhunga Champhai in ruahtui a dawn hnem ber tum niin January thla khan Champhai in ruahtui a dawng lo thung a. Chawh rualin kumin chhungin Champhai in ruahtui mm 973.8 a dawng a, thla tin ruahtui mm 162.3 tla ziah ang a ni. Kum 10 kal ta chhunga June thla bikah kum 2018 khan ruahtui tlak tam ber tum niin mm 493.2 a tla a, kum 2015 khan ruahtui mm 182.31 tla in Kum 10 kal ta chhunga Champhai in ruahtui a dawn tlem ber tum a ni thung. Kum 10 chhungin Champhai ah ruahtui mm 18,536.4 a tla a, chawhrual in kum tin ruahtui mm 1788.75 tla  ziah ang a ni.

Ruihhlo man

RUIHHLO MAN : Nilaini khan Champhai Police leh Narcotic  Squad, Aizawl te chuan herion, No 4 an man. Herion an man hi gram 137-a rit, hawng 11 niin sahbawn bawm chhunga thun a ni a, Champhai Police leh Narcotic Squad, Aizawl tangkawp hian Hringlangtlang pengah Champhai lam rawn panpuitu Neihlianthanga kum 32, s/o Bawikiana, Ruantlang nia inchhal hnen atanga an man niin, tualchhung hralhna atanga chhutin  ruihhlo hi Rs Nuai 5.5 man vel a ni. Neihlianthanga hi ND&PS Act  hmanga thubuai siamsak niin nimin khan court-ah thawna ni.

Chanchinthar tawi lawrkhawm

PARKING FEE KHAWNTU THLANG THAR : Parking Fee Champhai District Transport Dept chuan khawpui chhunga parking fee khawntute a thlang thar. Parking fee khawntute hian tun thla ni 10 atanga kum 2020 June ni 30 thleng an khawn chhunzawm dawn a.Parking Fee khawntute hi Lalawmpuii, Lalthantluangi, Lalthlamuani. Lalchhawnkimi leh Lahduhawma te an ni. Parking fee hi two wheeler-ah darkar 1 emaw a aia tlemah Rs. 5 niin darkar tinah Cheng 5 zelin a pung a. Lirthei dang zawngah chuan Cheng 10 niin darkar khatah Cheng 10 zelin a pung bawk.


TUIALHTHEI Mizofed Pump MS : Free Sale HSD : Free Sale RC Filling Station MS : Free Sale HSD : Tanky Only RD Filling Station MS : Hriat loh HSD : Hriat loh