Skip to main content

Posts

Showing posts from July 15, 2019

RUIHHLO NGAITE ENKAWL CHUNGCHANG NGAIHTUAH

RUIHHLO NGAITE ENKAWL CHUNGCHANG NGAIHTUAH : Nimin khan Champhai DC Conference Hall-ah ruihhlo ngaiten a bik taka enkawltu tha an neih theihna tura Doctor neih a tul thu leh De-Addiction Centre hmunhmate tihchangtlun dan tur thlirin thutkhawm a ni a. He inrawnkhawmna hun hi District Bawrhsap Dr. Naveen Aggarwal chuan kaihruaiin, Champhai District-a Tlawmngai pawl hruaitute leh MJA Member-te an tel a ni. Bawrhsap chuanChamphai chu ruihhlo  kawngkapui a awm a nih avangin thalai zingah ruihhlo ngai tam tak an awm tih sawiin, heng miten nunphung pangngai an zawh theihna tura enkawlna leh chhawmdawlna tha an dawn theih nan, hetiang lama enkawltu thiam bik Doctor neih a pawimawh thu a sawi a. Ruihhlo ngaite enkawlna hmunhma tihchangtlun a tul thu a sawi bawk a. Hetiang nei thei tur hian District thuneitute leh khawtlang mipui te inlungrual taka tanrual a ngai tih a sawi a. Ruihhlo leh akaihhnawih ngawl veina chuan mi pakhat chauh nilo vin, chhungkua, khawtlang leh ram kawngah thawhho a ngai…

REDUCTION SALE KHAR TA

REDUCTION SALE KHAR TA : Champhai Synod Book Room Reduction Sale neih chu Inrinni khan khar a ni. Reduction Sale hi kar kalta chhung khan Champhai-ah neih niin Book Room a lehkhabu awm, chi hrang hrang te chu a man pangngai aia za zela 5 atanga 80 inkar a hniama hralh a ni a. Lehkhabu chi hrang hrang 100 chuang te chu Reduction Sale chhung hian hralh chhuah niin, lehkahbu hralh chhuah zawng zawng hi Cheng 8,62,000 vel bawr niin, nikum khan Cheng 7,81,000 man hralh a ni a. Kumin hian Cheng 81,000 in nikum an khum a. Champhai Book Room nghaktute chuan kumtin lehkhabu hralh lamah hma an sawn zel thu sawiin,  kumtin lehkhabu hralh zat hi a pung zel a, hei hi Champhai tan chuan hmasawnna ropui tak ni a an hriat thu an sawi a ni. Inrinni tlai lam khan Rev. Lalthapuia, Kahrawt Bialtu Pastor chuan malsawm tawngtaina hmangin  Champhai-a Synod Book Room Reduction Sale neih hi a khar a ni.

RUIHHLO MAN

RUIHHLO MAN : Nimin chawhma khan Champhai Khankawn Police Check Gate a duty-te chuan Zokhawthar kaltlanga lakluh Heroin Hawng 5 (Gram 70) an man. Champhai Police hotute hnen atanga thu dawn danin Police duty-ten lirthei pakhat (KWID Car MZ-06-8073)an enfiahna lamah Heroin Hawng 5 (Gram 70) hi man a niin, ruihhlo neitu-a puh mi pahnih 1) Simon Lalruatfela kum 29 s/o Lalzuiliana, Khumtung khua ni a insawi leh 2) Lalthanmawia kum 38 s/o R. Lalnunmawii Baktawng khua ni a inchhalte chu an man bakah lirthei chhunga ruihhlo thuhruk saktu ni-a sawi, an thurualpui lirthei khalhtu  Lalhmachhuana kum 42 s/o Sapzinga Baktawng  khua ni a insawi chu man tel an ni a. ND & PS Act tlawhchhan a thubuai siamsak an niin, ruihhlo phurhna lirthei pawh hrensak nghal a ni. Heroin man tak hlut zawng hi tualchhung hralhna a chhutin Cheng Nuai 2.5 a ni a, nimin khan heng mite hi District  Court-a hruai an nih hnuah Champhai District Jail-ah dahluh nghal an ni.

LIRTHEI DINHMUN

LIRTHEI DINHMUN : June thla chhung khan District Transport Office ah lirthei 150 ziahluh thar a ni. Lirthei ziahluh te hi 2 wheeler 92, Car 29, Bolero 4 leh Truck 25 te a ni a, hriat theih chinah lirthei ziahluh hnuhnung ber hi MZ04 A 2683 a ni.  June thla chhung vek khan lirthei mihring phur chi atangin Cheng 11,400 hmuh a ni a, bungraw phur lirthei Rs. atangin 1,52,000 hmuh niin, Road Tax atangin Rs. 8,67,826 hmuh a ni a, MV Fee atangin Rs. 4,53,350 hmuh niin Parking Fee atangin Rs. 34,310 leh Compounding Fine atangin Rs. 11,800 hmuh a ni a. June thla chhunga chhiah hrang hrang atanga pawisa tlingkhawm hi Cheng 15,30,686 a ni.

ZIRLAI TITHA CHAWIMAWI

ZIRLAI TITHA CHAWIMAWI : MZP Ngur branch te chuan Inrinni zan khan Ngur khua atanga zirlai titha mi 36- HSLC, HSSLC, BA, MA, BEd pass thar te chawimawina hun an hmang. Khuallian P.Lalrinmawia, Dy Commissioner of State Tax chuan thu sawiin, taimakna leh thawhrimna chauh hmachhuan a,  theihtawp  chhuah turin zirlai kalkhawm te a fuih a, rilruah tum fel tak nei a taimakna a chhun zawm turin a chah a ni. He hunah hian C. Lalthazuala, Asst Commissioner of State Tax chuan career guidance hun a hmang a. MZP Hqrs Champhai atang President  H.Lalramhluna ho in hruaitu eng emaw zatin an hmanpui bawk a, Champhai North bialtu MLA Dr ZR Thiamsanga'n pass tharte lehkhabu present hlanna hun MNF Champhai North Block-l hruaituten an hmang bawk.

LEIMIN VANGIN IN 2 RAUHSAN

LEIMIN VANGIN IN 2 RAUHSAN : Khawbung RD Block huam chhunga Khankawn khua, Kawn Venga chhungkaw hnih luahlai In chu leimin avangin bungrua thiar chhuah a ni. Tuipuiral Tlangdunga khaw hrang hrang inkalpawhna kawngah  kawngko min hmun eng emaw zatah a awm a. Khuangleng leh Leithum khaw inkarah leiminin kawng a hnawhpin avangin District Hospital panpui tur dam lo hun eng emaw chen a dan hnuah YMA leh Dungtlang Polic-te hmalaknain PWD thuneitute biakrawn hnuah leimin hnawhpin kawngpui hi thenfai a ni a. Inrinni khan Farkawn leh Thekte inkar BRO kawngpui-a culvert tui chuan a thlanga rampalailengah lei hreuh thlain a chheh vel Khankawn khuaa Pu Dengchhunga te in leh Pi Vaithluaii te in bul chu meter 50 bial zet lei a titawlh a ni.

News tawi zual

THLAI THAR TAM RIH LO : Tunlai hian tualchhung thlai thar a la tam loh avangin Champhai Bazar-ah anhnah leh thlai rah man a la to rih hle a, Ar lei tur a van deuh avangin Arsa pawh a man a la sang rih hle bawk.

TUIALHTHEI DINHMUN Mizofed Pump MS : Khawl chhia  HSD : Khawl chhia  RC Filling Station MS : Nil HSD : Nil RD Filling Station MS : Hriat loh 

HSD : Hriat loh