Skip to main content

Posts

Showing posts from July 17, 2019

RUIHHLO NGAITE ENKAWL CHUNGCHANG NGAIHTUAH

RUIHHLO NGAITE ENKAWL CHUNGCHANG NGAIHTUAH : Nimin khan Champhai DC Conference Hall-ah ruihhlo ngaiten a bik taka enkawltu tha an neih theihna tura Doctor neih a tul thu leh De-Addiction Centre hmunhmate tihchangtlun dan tur thlirin thutkhawm a ni a. He inrawnkhawmna hun hi District Bawrhsap Dr. Naveen Aggarwal chuan kaihruaiin, Champhai District-a Tlawmngai pawl hruaitute leh MJA Member-te an tel a ni. Bawrhsap chuanChamphai chu ruihhlo  kawngkapui a awm a nih avangin thalai zingah ruihhlo ngai tam tak an awm tih sawiin, heng miten nunphung pangngai an zawh theihna tura enkawlna leh chhawmdawlna tha an dawn theih nan, hetiang lama enkawltu thiam bik Doctor neih a pawimawh thu a sawi a. Ruihhlo ngaite enkawlna hmunhma tihchangtlun a tul thu a sawi bawk a. Hetiang nei thei tur hian District thuneitute leh khawtlang mipui te inlungrual taka tanrual a ngai tih a sawi a. Ruihhlo leh akaihhnawih ngawl veina chuan mi pakhat chauh nilo vin, chhungkua, khawtlang leh ram kawngah thawhho a ngai…

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

GANJA SUAT

GANJA  SUAT : Khawbung JAC te chuan ruihhlo do kawnga an hmalakna kal zelah nimin khan thlawhlaia Ganja kung an suat. Khawbung khua hi Tuipuiral ah chuan Burma lam atanga Mizoram luh thlakna kawng. awmchhun a ni a. Dungtlang Police Outpost awm hnuah pawh Samthang leh Khawbung inkar kawng hlui chu ralthuam leh ruihhlo tawlhna kawng a nih. avangin dan kalha chetna do kawngah JAC ten hma an la reng a. He an hmalakna kal zelah hian nimin khan Khawbung thlawhlaia Ganja ching awm nia thu an dawn chu bawhzuiin Zawngsih ral Mualzal mawngah leh Pu Vara Mual-ahte insem darhin Ganja kung eng emaw zat an suat a, heng Ganja hi a hmunah an hal ral nghal.

CHHIATNA THLENG AWMLO

CHHIATNA THLENG AWMLO : Tunhnaia ruahsur nasa avangin Mizoram hmun dangah chhiatan thleng eng emaw zat a awm laiin, Champhai District Disaster Management chuan ruahsur kaihhnawiha chhiatna thleng report an dawn loh thu an sawi. Hetihlai hian kawng chhia avanga Champhai district mipui tana harsatna thleng mek a ziaawm theih nan Keifang leh Champhai inkarah lirthei tlan dan tur ruahman chu hman mek zel a ni a. Police te pawhin hma an la zui zel tih thu kan dawng.


MINISTER MANUNA CHAMPHAIAH

MINISTER MANUNA CHAMPHAIAH : Mizoram sawrkara State Protocol Officer chuan Mizoram hmun hrang hranga Minister-ten kumin Independence Day an hmanpuina tur tichhuakin, Champhai-ah chuan Law & Judicial Minis- ter TJ Lalnuntluanga'n a hmanpui ang a. Khawzawlah chuan Home Minister Lalchamliana'n a hmanpui thung ang.

News tawi zual

DVO SAWN : Champhai DVO Dr. M.Zohmingthangi chu Dy Director (LS), Directorate of AH&Vety hna chelh tura sawn a ni a, a hmun ruak hi Lawngtlai DVO hna chelh mek  Dr B.Zonghinga chuan a rawn luah ang.

AWARENESS CAMPAIGN HMANG TAN : Vawiin atang hian Champhai Police leh Excise-te chuan Champhai Police Stattion Conf. Hall-ah ni thum awh tur Capacity building programme on Drugs abuse prevention for Police functionaries tih thupui hmangin awareness campaign an buatsaih dawn.

TUIALHTHEI DINHMUN Mizofed Pump MS : Khawl chhia  HSD : Khawl chhia  RC Filling Station MS : Nil  HSD : Nil  RD Filling Station MS : Nil HSD : Free Sale