Skip to main content

Champhai Tualchhung Chanchin Thar Ni 18.7.2020 (Inrinni)

 𝗣𝗢𝗦𝗜𝗧𝗜𝗩𝗘 𝟮 𝗞𝗔𝗡 𝗡𝗘𝗜 𝗕𝗘𝗟𝗛 𝗛𝗟𝗔𝗨𝗛:
Ningani-a ZMC Laboratory-a Sample endik zingah Champhai District mi Positive an awm lo .
Nimina Zoram Medical College-a Sample 248 endik zingah Champhai District mi 3 telin an result hi a negative vek a, heng mi 3 te hi Champhaia Sample lak ni lovin Hmun danga Sample laksakte an ni. Dr. Samuel Laldinthara MO, IDSP sawi danin Champhai District atanga Sample thawn result chhuak tawh 1352 zinga mi 10 te tih loh chu an la negative vek a, Ningani khan Sample 74 thawn thlak leh niin result nghah mek a ni.
Champhai District-a Sample lak zawng zawng chu 1425 a ni a, tun hnaia State pawn atanga rawn haw DPRC Quarantine Centre-a awm mi 6 te leh Tourist Lodge-a awm mi 19 te Sample erawh la laksak loh niin, an rawn thlen atanga ni 5 hnuah Sample hi laksak an ni ang.
 Nizana ZMC-a sample test 160 zingah positive 10 hmuhchhuah a ni a. Positive te hi puitling kum 21-50 inkar leh naupang kum 7 mi; Aizawl 5, Champhai 2, Siaha 3; Bihar, Assam, Delhi, W.Bengal, Rajasthan, UP, Assam & Maharashtra atanga lo kir an ni. Delhi atanga Myanmar-a haw tur 2 Aizawla sample lak hnuah an kalna tura ruahman motor-in Ni 16.7.2020 khan Champhai an thleng a, Tourist Lodge-ah quarantine an ni. Positive zinga 4 hi hnam dang, NDRF mi, Lungverha awm mek an ni. Positive thar zinga 3-in symptoms an nei a, 8 in an nei lo thung.
Heti hian Mizoramah Covid 19 vei mi 282 an awm tawh a, heng zinga mi 160 chu enkawl dam tawh niin, vei mek 122 an awm a ni.

𝗖𝗛𝗜𝗘𝗙 𝗠𝗜𝗡𝗜𝗦𝗧𝗘𝗥 𝗛𝗡𝗘𝗡𝗔𝗛 𝗡𝗚𝗘𝗡𝗡𝗔 𝗧𝗛𝗟𝗘𝗡 :
Champhai Thalai Pawl leh MZP Hqrs. Champhai te chuan nimin khan Mizoram Chief Minister hnenah NHIDCL ten Champhai to Seling Double Lane turah ruahmanna an siam ang a kaltlangpui turin ngenna an theh lut a. Kawngpui hi ruahman dan chuan Puilo lamah kalin Champhai leh Aizawl inkar, Km 190 bawr vel chu Km 150 bawr velah a chhuak thei dawn a ni.

𝗠𝗜𝗡𝗜𝗦𝗧𝗘𝗥 𝗜𝗡 𝗔 𝗕𝗜𝗔𝗟 𝗙𝗔𝗡𝗚 𝗗𝗔𝗪𝗡 :
Law & Judicial Minister TJ Lalnuntluanga chuan nimin atang khan a bial, Champhai South chhunga HSSLC exam leh HSLC Compartmental exam a hlawhtlinna changte lawmpuina thilpek a hlan.
Law & Judicial Minister, Champhai South bialtu MLA ni bawk, TJ Lalnuntluanga
chuan Zirlai hlawhtlinna changte thinlung taka a lawmpui thu sawiin, an kal zelna turah duhsakna a hlan a; taima taka an zirlaite zir chhunzawm zel turin a fuih.
Zirlai hlawhtlinna chang tharte chu kum kalta a a lo tih tawh angin an chenna in ngeia kal a chibai buk a duh laiin, tunlai hrileng vanga in lama inkal chilh a rem ta lo chu pawi a tih thu a sawi a. Zirlaite chu nakin lawka ram leh hnam kaihruaitu leh innghahna tur an ni tih inhria a, taima leh rinawm taka lehkha zir turin a chah a ni.
TJ Lalnuntluanga hian nimin zing khan Aizawl chhuahsanin Champhai a rawn pan a, Tuipui khuaa zirlai pass tharte lawmpuina thilpek a pek hnuah Chhungte, Jail Veng, Kanan Veng leh Dinthar Veng te rawn tlawh chho lehin zirlai hlawhtlingte lawmpuina thilpek a hlan nghal a. Nimina zirlai hlawhtling lawmpuina thilpek a pekte hi mi 36 an ni.
Law Minister chuan Tuipui khuaah hian Khawzawl BDO hruaiin Community-cum-Boxing Hall sak dan tur a enpui a, Minister ruahmanna angin vawiin hian Engineer
ten Hall sak dan tur hi a hmunah an enfiah nghal dawn a ni. Ruahman lawk ang chuan Minister hian vawiin leh Thawhtanni khian a bial chhunga zirlai hlawhtlinna changte lawmpuina a hlan chhunzawm ang a, Thawhlehni zing karah Ruantlang-Mualkawi kawng hlui siam dan tur enin, tukthuan eikhamah Aizawl a pan leh ang. 

𝗚𝗥𝗔𝗣𝗘 𝗟𝗘𝗜 𝗧𝗔𝗡 :
Nimin khan Champhai Grape Growers Society chuan Grape chingtute thar Grape rah an lei sak.
Champhai Grape Growers Society chuan kumina a tum khatna atan nimin khan Tlangsam Winery-a dah turin Champhai leh a chheh vela Grape chingtute Grape thar chhuah an leisak a, Grape hi Society member-te ta chauh leisak lovin a duh apiang ta an leisak a, Kg 1 Rs 50 zelin an leisak a ni. Thu dawn danin kumin hian kum dang aiin Champhaiah Grape rah a tha a. Tlangsam Winery-ah hian kum dangah Grape rah Quintal 1800 vel lei thin ni mah se, nikum lamah Grape leikhawlsa an la neih tam avangin kuminah erawh Quintal 1500 vel chauh an lei dawn niin thu dawn a ni bawk.

𝗟𝗜𝗥𝗧𝗛𝗘𝗜 𝗣𝗨𝗡𝗚 𝗭𝗘𝗟 :
District Transport Office, Champhaiah June thla chhung khan Lirthei 46 ziah luh a ni. June thla chhunga District Transport Office Champhaia lirthei ziah luhte hi Lirthei ke pahnih nei chu 33, Car 8 leh Bungraw phur chi 5 te a ni. DTO Office Champhai-ah hian June thla chhung khan chhiah chi hrang hrang Cheng 6,69,529 chhun luh a ni a, passenger phur chi lirthei atangin Rs. 24,100 chhun luh a ni a, Bungraw phur chi atangin Rs. 67,300; Road Tax atangin Rs. 2,54,629 chhun luh niin MV Fees atangin Rs, 3,08,500 chhun luh a ni a; Lirthei dan bawhchhiate pawisa chawi Rs. 7,000 chhun luh a ni bawk.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…