Skip to main content

Ni 4.8.2020 (Thawhlehni) 𝗖𝗢𝗩𝗜𝗗-19 𝗣𝗢𝗦𝗜𝗧𝗜𝗩𝗘 𝗘𝗡𝗞𝗔𝗪𝗟 𝗗𝗔𝗠𝗧𝗘 𝗣𝗢𝗟𝗜𝗖𝗘 𝗜𝗡 𝗠𝗔𝗡 𝗡𝗚𝗛𝗔𝗟 :Nimin chawhma khan Covid 19 kai enkawl dam mi pahnihte leh Tourist Lodge a Quanrantine mi 11 te Sairang Police in man nghal.

𝗖𝗢𝗩𝗜𝗗-19 𝗣𝗢𝗦𝗜𝗧𝗜𝗩𝗘 𝗘𝗡𝗞𝗔𝗪𝗟 𝗗𝗔𝗠𝗧𝗘 𝗣𝗢𝗟𝗜𝗖𝗘 𝗜𝗡 𝗠𝗔𝗡 𝗡𝗚𝗛𝗔𝗟 :
Nimin chawhma khan Covid 19 kai enkawl dam mi pahnihte leh Tourist Lodge a Quanrantine mi 11 te Sairang Police in man nghal. 
Nimin a mi pahnih enkawl dam DCHC chhuahsan ta te hi Myanmar lam mi niin July ni 11, khan Delhi atangin Mizoramah an rawn chho a, July ni 16-ah Champhaiah rawn thawn chhoh niin, Tourist Lodge-ah khunghran an ni a. July ni 17 an Covid 19 an kai tih hmuhchhuah niin Covid 19 kaite enkawlna tur bika duan Dedicated Covid Health Centre Champhaiah dah luh nghal an ni a. July ni 30 khan an sample hi laknawn sak niin Covid 19 an kai tawh lo tih finfiah a ni a. DCHC Recovery Ward-a dah an nih hnuah nimin khan Covid 19 an kai tawh lo tih finfiahna lehkha pek niin hemi hnu hian DCHC atanga chhuah tir an ni.
Covid 19 kai enkawl dam takte hi Myanmar lam mi Delhi atanga Mizoram rawn lutte an nih avangin Sairang Police Station-ah thubuai siamsak an ni a, DCHC atanga an chhuah hnu hian Sairang Police te'n an la nghal a.
Mizorama an rawn luhpui Bengaluru atanga rawn haw Tourist Lodge-a khunghran mi 11-te pawh Khunghran hun an hman zawh hnuin Sairang Police-te'n an rawn la tawh bawk a ni.

𝗖𝗛𝗛𝗨𝗡𝗚𝗧𝗘 𝗞𝗛𝗨𝗔 𝗜𝗡 𝗦𝗔𝗪𝗥𝗞𝗔𝗥 𝗡𝗚𝗔𝗜𝗖𝗛𝗔𝗡𝗚 𝗛𝗥𝗜𝗛 𝗗𝗔𝗪𝗡 :
Champhai Chhungte YMA leh VC te chuan thuchhuah siamin Assam Rifles te mipui hmanga hnawhchhuah an tum chu Mizoram Sawrkar nen inbiakna an neih hnuin an thulh rih tih an sawi.
Chhungte YMA leh VC te hian August ni 3 ral hmaa Assam Rifles ten an ram chhung an chhuahsan lo a nih chuan nasa zawka hmalak an tum thu hi thuchhuah siamin an lo tarlang tawh a. Nimina thuchhuah an siama an tarlan dan chuan an khaw ram chhunga Assam Rifles duty-te mipui hmanga hnawhchhuah an tum chu Mizoram Sawrkar nen inbiakna an neih hnuah Sawrkarin Assam Rifles-te sawn chhuak tura chak taka hma la tura an tiam avangin an thulh rih tih sawiin, Sawrkar hmalakna ngaihchan rih tha an tih thu an sawi a.
Hetih lai hian Sawrkarin mumal taka hmalakna a nei zui a nih loh chuan
khawtlangin hma an lak zui zel tur thu an sawi bawk.
Assam Rifles te hian Chhungte khaw mipui leh Champhai khawpui chhunga kal vel leh Passenger phurte chet velnaah phurrit siam lo tura an phut thu leh thil kal zel tur an thlirin Assam Rifles te chu Chhungte khaw ram atanga an insawn chhuah ngei an phut tlat tih an sawi bawk.

𝗥𝗨𝗔𝗡𝗚 47 𝗣𝗛𝗔𝗪𝗥𝗛 𝗞𝗜𝗠 𝗧𝗛𝗘𝗜 :
Inrinni chawhnu leh zana a ruahsur nasa khan Champhai khawpui chhungah harsatna a thlen nasa hle a, Kanan veng thlanmual chu ruang sawn ngai khawpin a min.
Kanan Veng thlanmual leimin hian hriat theih chinah thlan 47 a tichhia a, nimin khan lei minin thlan a tihchhiata ruang sawn ngai te chu thlanmual awmna mual lehlamah Excavator hmanga lei laikhuarin sawn kim a ni a, thlanmual hmun hma tihfel ngaite leh thlan thiah ngai te thiatin veng chhung mipui bakah Chhungte Branch leh Jail Veng Branch te, veng hrang hrang atangin mi tlawmngai te an thawkchhuak a ni.
Champhai South Bialtu MLA TJ Lalnuntluanga chuan hnatlang te thingpui inna tur Cheng 10,000 a pe a. Champhai BDO leh Champhai SYMA te leh mimal tlawmngai te chuan hnatlang te thingpui lumna tur an pe bawk a, nimin khan hnatlang hi neih chhunzawm leh a ni. 

𝗜𝗡 𝗣𝗔𝗧𝗛𝗨𝗠 𝗧𝗛𝗜𝗔𝗧𝗜𝗡 𝗜𝗡 17 𝗥𝗔𝗨𝗛𝗦𝗔𝗡 :
Khawbung RD Block huamchhunga Thekte Khua-ah leikhi avangin In pathum thiah a ni.
July ni 28 a lirnghing khan East Tuipui bial chhunga Thekte khuaah Leikhi nasa tak a siam a, ruahsur nasa avangin nimin khan khik belh zualin chenna In pathum chu khawtlang a hnatlangin thiah a ni a. In 17 chu dinhmun hlauhawma a awm avang leh luahzui ngam a nih loh avangin an inthiar chhuak bawk.
Leikhi hi metre 30 vela thui niin a thlang kawngpuiah tui a put nasa hle bawk a, he tuiput hian kawngpui thlang lam a In awm te tan min hlauhawm tak a siam belh niin Thekte khawtlang hruaitute chuan an sawi a. Nimin vek khan East Tuipui bialtu MLA Ramthanmawia, Bamboo link road Vice chairman ni bawk chuan chhiat tawkte a tawrhpui thu a sawi a. A aiawhin East Tuipui South Block President Ramdinliana chuan tanpuina pawisa fai Thekte VC te a
hlan bawk a ni.
MLA chuan sawrkar atangin a tul anga hmalak zel a nih tur thu kan palai a hrilh a, nimin khan Thekte khawtlang chhiat tawkte Tuipuiral Block MHIP hruaitute chuan tlawh nghal in Tuipuiral MHIP Vice President Lalrochhari chuan tanpuina atan pawisafai a hlan nghal bawk. 

𝗛𝗢𝗨𝗦𝗜𝗡𝗚 𝗟𝗢𝗔𝗡 𝗗𝗜𝗟 𝗧𝗛𝗘𝗜𝗛 :
UD&PA Department kaltlangin August 20, 2020 thleng khian Credit Linked Subsidy Scheme/Housing Loan dilna hun hawn a dawn a. Housing Loan dil duhte chuan document pawimawhte kengin DUDO Office, CHANEM Building Top Floor-ah Pisa hun chhungin an zawtfiah thei ang. A thlawna insak tanpuina Beneficiary-Led Individual House Construction (BLC) leh Credit Linked Subsidy Scheme (CLSS) / Housing Loan-te hi dil/dawn kawp theih a ni lo ang.

𝗣𝗥𝗢𝗝𝗘𝗖𝗧 𝗦𝗜𝗔𝗠 𝗧𝗛𝗘𝗜𝗛 :
UNO hnuaia peng pakhat Fund for Agricultural Development (IFAD) kaltlanga hmalakna, Fostering Climate Resilient Upland Farming Systems in the North East (FOCUS) hnuaiah Agro Entrepreneur/Innovator, Society emaw, pawl emaw huan/lo/ranvulh lama tui mite tan Project siam theih a ni a. District Bawrhsap kaltlangin Project an siamte State Project Director, FOCUS, Mizoramah thehlut leh tur a ni ang. Project-te endik hnua tanpuina dawng tlaka ngaih thlan chhuahte chuan FOCUS hnuaia Innovation Fund (IF) an dawng thei dawn a. Innovation Fund atana Draft Guidelines siam chu DC Office, Champhai atangin Rs 5/- pein a lakchhuah theih. Hemi chungchang hrechiang duh tan DC Office leh DAO Office-ah te Pisa hun chhungin zawhfiah theih a ni.

𝗠𝗜𝗡𝗜𝗦𝗧𝗘𝗥 𝗥𝗔𝗪𝗡 𝗛𝗔𝗪:
Law & Judicial Minister, Champhai South bialtu MLA TJ Lalnuntluanga chuan nizan khan Champhai rawn thlengin, tukin dar 7:00 hian Kanan Veng thlanmual min leh khuarel chhiatna thleng dangte tlawhin a enfiah ang a. Tukthuan ei khamah Kelkang leh Dilkawn khua inkalpawhna laih zauh tur a en leh bawk ang. Naktuk hian Aizawl panin a kir thla leh ang.

𝗡𝗚𝗢 𝗖𝗢-𝗢𝗥𝗗𝗜𝗡𝗔𝗧𝗜𝗢𝗡 𝗧𝗛𝗨𝗞𝗛𝗔𝗪𝗠 :
Nimin khan NGO Co-ordination Committee Champhai chu an thukhawm.
He meeting-ah hian Champhai hmasawnna kawnga midangte ke pen ruala ke pen ve a nih theihna tur leh State sawrkara innghat ngawt lova Champhai District khawpui hmasawnna atan Municipal Council-a inrelbawl tha an tih thu sawiin, mipui te fiahfai zawka hriattir ni se, an ti a. Champhaiin Monument pawimawh a neihte tuaihnum loha awm chu NGO CC chuan a veiin chei that a nih theihna turin hmalak ni se, an ti bawk. State Capital Aizawl panna kawng laihzauh tumna awm chu kawng dang anga kum 10 tel hun la lova, Kum hnih/thuma laih zawh a nih theih nan Environment clearance-te'n a tihkhawtlai loh dan tur zawn ni se, he mi kawnga hmalak tawhna chak zawka bawhzui ni se, an ti bawk. 

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…