Skip to main content

Ni 20.8.2020 (Ningani)

𝗩𝗢𝗧𝗘 𝗧𝗛𝗟𝗔𝗞 𝗗𝗔𝗡 𝗧𝗨𝗥 𝗦𝗔𝗪𝗜 𝗛𝗢 :
Tunlai hri leng mek Covid-19 laka mipui himna tur ngaihtuah chungin, Village Council inthlan ni-a vote thlak dan tur chungchang nimin khan District Election Officer, Maria CT Zuali hovin rel a ni.
DC Conference Hall-a thutkhawmah hian Champhai District Election Officer, Maria CT Zuali chuan Village Council inthlanna buaipuitu, State Election Commission duh danin, Covid-19 hri leng laka inkaihhruainate zawm chungin mumal leh awmze nei taka vote thlak a nih theihna turin ruahmanna siam tum a ni, a ti a. Covid-19 vangin inthlan tawh dan kal phung hmasate zawm a rem tawh loh thu leh hma lak dan tur ngaihtuah tura thut khawm chu koh a nih thusawiin; inthlanna muanawm leh felfai tak neih a nih theihna kawnga tangkai tak Mizoram People Forum-te nena tangkawpa hma lak leh a ngai dawn tih a sawi a. Hri pui leng laka fihlim turin kan zavaia tanho a ngai a; Official level atanga mipui himna tura mamawhte chhawp chhuah tum a nih thu sawiin, MPF leh NGO hruaitute pawh mipui zirtir leh hrilh kawngah theihtawp chhuah turin a sawm a. Inthlan campaign nana social media kal tlanga inbeihna leh inchirhthehna awm theiahte beng chhi reng tur leh hma lak zelna kawngah thuneitute tawiawm a, puibawm turin a ngen a ni. 
Inthlan hmain vote neite hnenah Voter’s Slip, VC Roll-a an serial number indawt ang zel leh vote thlak hun tur darkar bituk tarlanna chu sem lawk vek ni se. Voter’s Slip chu MPF kaihhruaia sem chhuah a. Vote thlak turte chu an vote thlak hun tur bituk zelah vote thlak tura beisei an ni a; veng chhung Information Centre leh Whatsapp kal tlangin inhrilh tura ruahman a ni a. 
Vote thlakna hmunah vote thlaktu hming leh biakpawh theihna phone number, chhinchhiahna bu-a ziah luh zel ni se tiin, MPF-te kutah mawhphurhna pek a ni a. Vote thlak ni-a mipui zawm tur leh an himna tura ruahmanna district puma rualkhai taka hman theih tur Election Office-in duang se, mipui hnenah a zau thei ang bera puanzar ni se tih a ni bawk. 

𝗖𝗛𝗔𝗠𝗣𝗛𝗔𝗜 𝗗𝗜𝗦𝗧𝗥𝗜𝗖𝗧-𝗔𝗛 𝗛𝗥𝗜 𝗞𝗔𝗜 𝗧𝗛𝗔𝗥 𝗔𝗪𝗠𝗟𝗢:
Niminpiaha Champhai District Hospital-a Rapid Antigen Test hmanga Sample endikah Covid 19 kai an awm lo.
Dr. Samuel Laldinthara, MO, IDSP sawi danin, niminpiah khan Champhai District
Hospital-ah Rapid Antigen Test hmangin Sample 21 endik a ni a, sample endikte
hi mipa 12 leh hmeichhia 9 an ni a. Tun hnaia Sate pawn atanga rawn haw Manipur, Assam, Tripura, Karnataka,
Madhya Pradesh, Delhi, Bahrain leh Myanmar atanga rawn haw an ni. Result Negative zingah hian Champhaia hrikai hmuhchhuah hnuhnung ber, hnam dang mi 2-te pawh an tel a ni.
RAT hmang hian Pathianni khan Sample 2 lak a ni bawk a, an result a negative a. Champhai-a Rapid Antigen Test hman a nih atangin sample 179 endik tawh niin, Covid 19 kai mi 4 hmuhchhuah an ni a. Heti hian ZMC Lab. leh Silchar-a thawnte nen Champhai District chhungah Sample 1891 endik tawh a ni a. Nimin khan Dedicated Covid Health Centre-a Covid 19
kai enkawl mek mi 2-te chu an sample endik nawn turin an sample laksak leh an ni.
DIPR in ZMC Lab-a Champhai District atanga sample endik mi 6 a tarlante
chu Champhai-a Sample lak ni lovin, Champhai District mi leh sa Aizawl-a Sample lak sakte an ni. Nimin tlai thleng khan Champhai District chhunga Sawrkar
hriatpui Quarantine Centre-ah mi 44-te khung hran mek an ni a. DPRC Quarantine
Centre, Keifangtlangah mi 15 - mipa 6 leh hmeichhia 9; Tourist Lodge Quarantine
Centre-ah mi 23 - mipa 18 leh hmeichhia 5 te khung hran mek an ni bawk a. In lama
khung hran mi 2 an awm bawk a; Dedicated Covid Health Centre-ah Covid 19 hri kai mi 4 te enkawl mek an ni bawk.

𝗕𝗔𝗭𝗔𝗥𝗣𝗨𝗜 𝗛𝗔𝗪𝗡𝗚 :
Champhai District Magistrate Maria CT Zuali chuan Champhai Bazarpui, Rahsi Venga chawhmeh zuara eizawngte harsatna sutkian a nih theih nan kartin Thawhtanni atanga Inrinni, zing dar 5:00 atanga tlai dar 6:00 thleng hawn phalna
thupek a chhuah.
Social distancing zawm a nih theih nan Bazara inpho ten anmahni dawrtute dinna tur metre 1 danah rin bial sim tur leh, seat khatah a zuartu bak midang thut phal a ni lo a. Bazara inpho leh a dawrtu ten hmai tuam ngei tur a ni a. Bazar hawn hun bithliah tha taka zawm tur a ni ang. Danin a khap angin Tuipui Bazara inpho erawh khap a ni thung.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 𝗠𝗔𝗡 :
Thawhlehni khan Champhai Police Flying Squad-te chuan inkharkhipna dan bawhchhia, vantlang hmuna hmai tuam lo mi 3 an man a, Rs. 100 theuh chawi tir an ni a. Tun hnaia inkharkhipna dan bawhchhia Champhai Police-ten an man zingah hian Thawhtanni-a Curfew laia lir thei tlan chhuak mi 3-te tih loh chu vantlang hmuna hmai tuam lo te vek an ni.

𝗥𝗔𝗠 𝗧𝗔𝗡𝗔 𝗧𝗔𝗪𝗡𝗚𝗧𝗔𝗜 :
Champhai Prayer Group atanga thu dawn danin, tun Pathianni chawhma dar 11:00 khian Champhai Vengthlang-a DK Traffic Point kiangah ram tana tawngtaina neih
tur a ni a. Tawngtai mite he huna tel tur hian an sawm a, a hmuna kal ve thei lote pawhin in lamah tawngtai thupui an chhawp chhuah hmanga theih tawpa tawngtai runpui hi lo hmanpui ve turin an sawm a ni.

𝗠𝗭𝗣 𝗤𝗨𝗜𝗭 𝗭𝗢 𝗙𝗘𝗟 :
August ni 7-18 chhunga buatsaih, HC Enterprise Ruantlang Br. MZP Quiz Competition 2020 chu zawh fel a ni a, Lalruatzela leh Lalramruatsangate tangkawp Photon Team te an Champion. Vanlaltlana leh Vanzampuii te tangkawp,
Smartinis Team chu pahnihna an ni.
Pakhatna hian Rs.7000 leh Certificate an dawng a; pahnihna hian Rs. 4000 leh Certificate an dawng bawk a. Team tel zawng zawngte hnenah Consolation Prize
pek vek a ni bawk.

𝗦𝗨𝗠𝗢 𝗖𝗛𝗘𝗦𝗨𝗔𝗟𝗔𝗛 𝗠𝗜 𝗣𝗔𝗞𝗛𝗔𝗧 𝗕𝗢𝗥𝗔𝗟:
Nizan dar 7 vel khan Khuangleng khaw dai-ah Maxicab pakhat chu chesualin, kawng thlangah meter 156 vela thui a lum a. Lirthei chesual ah hian nausen 6 leh puitling 10 an chuanga , chuang zinga Laltlanliani kum 33 chu a thi a, driver leh midang 15 in hliam an tuar a ni. Hliam lak chhuah hmasak apiangte hi Khuangleng Sub-Centre panpuia first aid pek an nih hnuah Champhai District Hospital panpui nghal an ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…