Skip to main content

Champhai Tualchhung ni 18.9.2020 (Zirtawpni)

𝗜𝗡𝗙𝗜𝗔𝗠𝗠𝗜𝗧𝗘𝗡 𝗧𝗛𝗜𝗦𝗘𝗡 𝗣𝗘 :
Nimin khan District Sports and Youth Office, Champhai huaihawtin Champhai-ah infiammite pualin Voluntary Blood Donation Camp buatsaih a ni a; Lalnunmawia, Chairman District Sports Committee chuan khuallian niin a hmanpui.
Obed Lalmalsawma, DSYO kaihhruaiin District Hospital Blood Bank-ah he hun hi hman a ni a, khuallian Lalnunmawia chuan hetiang tih nachang hria Champhai in DSYO a nei chu lawmawm a tih thu a sawi a, kuminah Sport hrang hrangah tournament buatsaih a nih theih loh laia mi nunna chhan na atan thalai infiammi te'n thisen an pe tur chu lawmawm a tih thu tarlangin thisen pe tura kalkhawm te ei leh in tur lei nan District Sports Committee hmingin Cheng 3000 a hlan nghal a ni.
He hunah hian Dr Zatluanga, District Medical Superintendent Champhai pawhin thu sawiin, DSYO in thisen pek runpui a buatsaih chu lawmawm a tih thu a sawi a. Tum dangah pawh DSYO huaihawta thisen pek a lo ni tawh thin thu leh sawrkar lama thisen pe awmchhun an ni tih a tarlang a ni.
District Hospital chu Specialist hrang hrang awmna a nih ve tak avangin thisen mamawhna a sang tawh hle a, Doctor te ngei pawh thisen pekah hian tan an la nasa in mi thahnem takin thisen an pe thin tih a tarlang a. Khawvel hian thalai te ah fitness a ngaipawimawh tawlh tawlh a, thisen pek hi fitness enna tha tak a nih thu a sawi bawk.
Thisen tlachham lova Blood Bank a dah a nih thin chhan chu mi tlawmngai te inpekna vang a nih thu sawiin, thisen pe tura kalkhawmte chu midangte entawn ni zel turin duhsakna a hlan a ni. Lalbulliana, Football Coach chuan CDFA hmingin Cheng 2000 a hlan hnuah lawmthu sawiin a khar a, thisen pek runpui tan nghal a ni a. Hripui leng mek vanga awmkhawm a remchan loh avangin thisen pek tumte chuan a tahtawl zelin District Hospital Blood Bank panin, Champhai khawpui chhunga Sports Association hrang hrang a infiammi leh an hruaitu, mipa 74 ten thisen hi an pe a ni.

𝗞𝗛𝗔𝗪𝗖𝗛𝗛𝗔𝗞 𝗩𝗔𝗪𝗞 𝗠𝗔𝗡 :
Champhai District chhung khawi khuaah mah Vawk, vawksa leh vawksa atanga siam reng rengte lakluh leh phurhchhuah khap tlat a ni, tih thupek Champhai District Magistrate Maria CT Zuali’n a lo siam tawh bawhzuiin, AH & Vety Department, Champhai Police leh Environment, Forest & Climate Change Department-te tangkawp chuan nimin khan North Diltlang khua atanga Champhai pana dan lova Vawk pathum phurhte chu Ngur khaw daiah an man.
Vawk neitu R. Lalhruaitluanga, Kum 36 S/o R. Lalengmawia, Champhai Vengthlang North, Vawk phurhna Bolero Pickup MZ 04-A 1406 leh Driver Lalrosanga, Kum 26 S/o Robula, North Diltlangte chu man niin, Champhai Police Station-ah thubuai ziahluh a ni. Vawk pathum man takte hi talh rual thiau niin, a hlut zawng hi Rs. 66,000/- ang a chhut a ni.
AH & Vety thuneitute chuan August Ni 19, 2020 khan ramri kaltlanga lakluh Vawk no man rual 7 te Tlangsam daiah an lo man tawh bawk a. Heng zinga 4 te chuan ran natna Porcine Reproductive & Respiratory Syndrome (PRRS) an vei tih hmuh chhuah niin, Court Case kal lai mek a ni.
Champhai District Magistrate Maria CT Zuali chuan Vawk natna hlauhawm tak African Swine Fever (ASF) laka Mizoram leh Champhai District him theihna turin ram dang leh State dang atanga Vawk, vawksa leh vawksa atanga siam reng rengte Champhai District-a lakluh khapna thupek leh Champhai District chhung khawi khuaah mah Vawk, vawksa leh vawksa atanga siam lakluh leh phurhchhuah khapna thupek chu ni 21.8.2020 khan a lo chhuah tawh a ni.

𝗕𝗔𝗪𝗥𝗛𝗦𝗔𝗣 𝗜𝗡 𝗧𝗛𝗨𝗣𝗘𝗞 𝗖𝗛𝗛𝗨𝗔𝗛:
District Bawrhsap, Maria CT Zuali chuan bawhhlawh paih dan chungchangah thupek thar a chhuah a. Chhangphut field leh DC Office, Keifangtlang inkarah leh Champhai District chhunga Bawlhhlawh paihna hmun bik ni lo, kawngpui kam khawi laiah mah bawlhhlawh paih phal a ni lo a. He thupek hian chhuah a nih atanga thla hnih chhung a huam dawn a. Thupek bawhchhiate chu IPC Section 188 hmangin hrem an ni ang.

𝗩𝗖 𝗧𝗛𝗔𝗥𝗧𝗘 𝗭𝗜𝗥𝗧𝗜𝗥𝗡𝗔 𝗛𝗨𝗡 𝗡𝗘𝗜 :
Champhai RD Block chhunga VC thlan tharte hnenah MNREGA chungchanga hriat tur pawimawhte zirtirna hun hman mek a ni.
Inzirtirna hi Block BNRGSK Building, Ruantlangah neih niin, kar hmasa Zirtawpni atang khan neih tan a ni a. R.Lalnunkimi, BDO Champhai, Programme officer ni bawk hovin nei thin a ni a. He hunah hian MNREGS hna thawh dan leh Social Audit neih dan chungchang chu Varhmingliana Varte, APO-in a zirtir a; Annual Action Plan leh Labour Budget chungchang chu Lalrozami Renthlei, TA-in a zirtir a, MIS chungchang chu TBC Lalrohlua, DEO-in a zirtir a; VEC leh VMC chungchang chu H.Rodinliani, PA-in a ziritr thin bawk a ni.
Nimin thleng khan VC 33-te hnenah zirtirna hi pek a ni tawh a, vawiin hian a hnuhnung ber atan Bethel, Kahrawt, Kanan leh Vengthar VC-te hnenah zirtirna hun hi hman a ni ang.

𝗛𝗥𝗜 𝗗𝗔𝗡𝗡𝗔 𝗣𝗘 :
Tunlai hian Khawbung Vety Doctor leh staff-te'n an bial chhung khaw hrang hrang - Dungtlang, Khawbung, Zawlsei, Khuangthing-ah te Vawk hri danna an pe mek a. Nimin khan Khuangthing khuaah hri danna hi Vawk 50 chuangah pek chhunzawm a ni.
Vawk natna hi thenawm ram Myanmar-ah a leng nasa hle a. Sawrkar thuneitute pawhin Myanmar ram atanga Vawk lak luh a nih loh nan theihtawp an chhuah mek zel a. Khawbung Vety Doctor, Dr Lalhmangaihzuala sawi danin, tunah hian African Swine Fever hi Mizoramah kai an awm hriat a la ni lo va, tuna Vawk na thenkhat ho hi chu awlsam te-a enkawl dam mai theih an ni, a ti.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…