Skip to main content

Ni 11.9.2020 (Zirtawpni)

𝗥𝗨𝗜𝗛𝗛𝗟𝗢 𝗡𝗨𝗔𝗜 20 𝗠𝗔𝗡 𝗛𝗨 𝗠𝗔𝗡 :
Nimin zing khan Champhai Police chuan Khankawn Police Check Gate (Chalbawia Junction)-ah Heroin Hawng 40 (Gram 488) an man a, Heroin neitu a puh mi pakhat man a nih bakah ruihhlo phurhna lirthei pawh man tel nghal a ni.
Champhai Police hotute sawi danin, Myanmar atanga lakluh Heroin hi Chungukliana kum 30 s/o Rothawma,
Tahan, tuna Zokhawthar a cheng mek ni a insawi chuan ama lirthei hmangin Aizawla phurh thlak a tum laiin Check Gate-ah hian man a ni a.
Heroin hi lirthei hmalam a thuhruk a nih vangin Hawng 7 dahna Sahbawn bawm 7 chu a kang sawr nghe nghe a. Chungukliana hian Champhaiah mi pakhat zinpui tura a sawm chu man tel a ni chungin, he ruihhlo tawlhnaah hian inhnamhnawih ve lova hriat a ni thung.
Chungukliana hi Champhai Police Station-ah ND &PS Act leh Foreigner Act hmanga thubuai siam sak niin, nimin khan District Court a hruai a nih hnuah Champhai District Jail-ah dahluh a ni a. Heroin man tak hlut zawng hi tualchhung hralhna a chhutin Rs. Nuai 20 man vel a ni.

𝗞𝗛𝗨𝗔𝗟𝗭𝗜𝗡 𝗛𝗜𝗣 𝗗𝗔𝗡 𝗧𝗨𝗥 𝗜𝗡𝗭𝗜𝗥𝗧𝗜𝗥 :
Nimin khan Champhai District chhung khaw pahnih, Kelkang leh Khawbungah Pi Fangi Tourism Development Agency (PF-TDA) leh North Eastern Council tangkawp buatsaihin khualzin hipna tur Ecotourism chawilar kawnga inzirtirna leh chhiatrupna thlen thulha chetlak leh tihtur tulte inzirtirna hun hman a ni. He hun hi Maria CT Zuali, Champhai District Bawrhsap chuan Khuallian niin a hmanpui a.
Khuallian Maria CT Zuali chuan Champhai District chu sik leh sa nuam tak, ram mawi leh nuam takin a bawm, a mi chengte pawh Zonun zemawi tak lantir thintute an ni tih a sawi a. Hun hran buatsaih lovin Ecotourism leh Disaster Management Training a ruala buatsaih a ni chu a dawngsawngtu ten an hlawkpui ngei a beisei tih a sawi a.
Ecotourism chawilarna tura inzirtirna leh hmalakna tura Mizoram khaw 900 chuang atanga Champhai District-a khaw 4 thlan tel a ni chu lawmawm a tih thu a sawi a. Khualzin hip thei turin tanlak thar a ngai a, sum thawhchhuahna tha tak a nih avangin kan lo inbuatsaih lawk ve a ngai a ni, a ti bawk.
Bawrhsap chuan leilung mawina leh hausakna kan neih angte kan hman tangkai thiam a tul thu sawiin, ram mawi tak kan nei hi a vanneihthlak hle, a ti a. Taksa, inchhung leh khawtlangah faina nunpui a tul thu pawh sawilangin, nun hrisel zawh tura hmasawn kawngah Zirtirtu, nu leh pa leh khawtlang hruaitute an pawimawh thu leh theihtawp chhuah tura a beisei tih a sawi. Vanramchhuangi (Ruatfela Nu) Chairman, Pi Fangi Tourism Development Agency chuan tunlai khawvelin Tourism a chawilarna pawimawh tak chu mawlmang taka a nihna thlak danglam lo a pholan a ni, a ti a.
PFA-TA tum ber chu theihna nei khua te'n khualzin an hipna tura tanpui a, khualzin tam zawk hipa khaw mite tihhmasawn tum a nih thu a sawi a. Thalaite hnenah an khawsakna khua leh a chheh vela theihna awm, leilung mawinate chhawr tangkaia eizawnna ngelnghet nei thei tura kawhhmuh tum a ni, a ti bawk. Pi Fangi Tourism Development Agency (PF-TDA) leh NEC tangkawp hmalaknain Mizorama khaw 5; N.Vanlaiphai, Farkawn, Khawbung, Samthang, Kelkang leh Tlangnuamahte Tourism chawilarna kawnga hmalak tum a ni a. Heng khuate hi pipu sulhnu, rinna leh sakhuana lam, ramngaw leh nungcha awm that avangte a thlan an ni a. Heng khuaahte hian Khualzinte hip a, khualzinte hnen atanga sum leh pai lakluh piah lamah tunlai khawvel nunphung leh ningkhawng hriat mai bakah Tourism tihhmasawn kawngah thui taka hmalak tum a ni.

𝗠𝗘𝗜𝗭𝗜𝗔𝗟 𝗠𝗔𝗡 𝗡𝗨𝗔𝗟 :
Nimin zing khawvar hma khan Champhai Police duty te chuan Champhai Tlangsamah ram dang siam Cigarette chi hrang hrang Case 20 an man.
Police hotute sawi danin, tihdan phung pangngai a Police-ten Champhai khawpui chhung an fankualna lamah nimin zing khawvar hma khan, dan lova lakluh ram dang siam Cigarette chi hrang hrang Case 20, lirthei pakhatin a phurh chu Champhai Tlangsamah an man a. Cigarette phurhna Lirthei khalhtu K. Lalropuia kum 38 S/o K. Lalramhluna, Champhai Tlangsam ni a insawi chu manin, Champhai Police Station-ah thubuai siam sak a ni a. Cigarette man te hi Champhai District Customs kutah hlan a ni. Ramdang siam Cigarette man tak hlut zawng hi tualchhung hralhna a chhutin Cheng 2,50,000 man vel a ni.

𝗘𝗫𝗔𝗠 𝗧𝗨𝗥 𝗧𝗛𝗨𝗟𝗛 :
DIET Exam tur chu hripui leng a darh zual avangin thulh rih a ni. September ni 1, 2020-a lo tihchhuah tawh DIET Examination, 2020 September ni 14, 2020 atanga tan tur tih chu tun hnaiah Covid-19 hri leng a darh zual avangin thu leh awm hma chu thulh a ni tih MBSE chuan a puang a, Exam neih leh hun tur chu inhriattir leh a ni ang.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Thawhlehni khan Champhai Police Flying Squad-te chuan inkharkhipna dawn bawhchhia mi 9 an man a, an zinga mi 8-te chu Vantlang hmuna hmai tuam lo niin Rs. 100 theuh chawi tir an ni a. Curfew laia lirthei tlan chhuak 1 manin Rs. 1000 chawi tir a ni bawk. Nilaini khan inkharkhipna dan bawhchhia mi 4 manin vantlang hmuna hmai tuam lo vek an ni. Ni 2 chhunga Champhai Police-te'n inkharkhipna dan bawhchhia an mante pawisa chawi tlingkhawm hi Rs. 2200 a ni.

𝗥𝗔𝗠𝗥𝗜 𝗗𝗨𝗧𝗬 𝗗𝗔𝗠𝗟𝗢 𝗞𝗔𝗡 :
Champhai BDO chuan CM Relief Fund atangin Covid-19 do kawnga ramri venga duty, damlohna neia hun rei tak enkawl tawh Israel Zochhuanpuia chu nimin khan tanpuina cheng sing 5 a pe a. BDO R.Lalnunkimi leh Zokhawthar OC ten a nu hnenah an hlan a ni. BDO hian Zokhawthara hmasawnna hnathawh thenkhatte chu a hmunah a enfiah nghal bawk.

𝗧𝗜𝗔𝗨 𝗟𝗘𝗜 𝗘𝗡𝗙𝗜𝗔𝗛 :
Nimin khan Zokhawthar Border Trade-a lei chu enfiah a ni. Lei endik tur hian Champhai BDO, PWD EE leh Revenue Dept te an thawk chhuak a. Myanmar leh India inkalpawhna lei dawh hian a dawl tur zata bithliah a la dawl zo em tih chu an endik a, he lei hi tun dinhmunah chuan a la tha tawkah an ngai a ni. Lei endikna hi Home Ministry thuchhuah bawhzuina a ni a, kumin February thlaa kalpui tura tih a nih tawh laiin inkharkhipna avangin nimin khan endik a ni.

𝗗𝗜𝗡 𝗖𝗛𝗔𝗠𝗣𝗛𝗔𝗣𝗛𝗔𝗞 𝗟𝗔𝗪𝗠 :
Nimin khan Champhai Zotlang YMA Branch-te chuan an branch din champhaphak vawi 59-na pualin Zotlang YMA Park-a an thingphunte hung tha in a hmun hma samfaiin an hnatlang a, thing tiak an phun belh bawk a ni. Zotlang Branch YMA hruaitute chuan Covid 19 hripui leng vangin member nawlpuia hnatlang in ko lovin Sawrkar bituk chin mi 100 bawr vel hnatlangin an thawk chhuak tih an sawi. Champhai Zotlang YMA
Branch-ah hian Member 1200 vel an awm mek a ni.

𝗛𝗥𝗜 𝗞𝗔𝗜 𝗣𝗔𝗞𝗛𝗔𝗧 𝗞𝗔𝗡 𝗡𝗘𝗜𝗛 𝗕𝗘𝗟𝗛 :
 Nimin zinga Champhai Kanan Venga Covid-19 positive hmuhchhuah thar, sipai chawlh hmanga lo haw chu DCHC Champhai-ah dahluh a ni tih thu dawn a ni a.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…