Skip to main content

Ni 19.9.2020 (Inrinni) Champhai Tualchhung Chanchin thar

𝗡𝗔𝗨𝗣𝗔𝗡𝗚 20 𝗜𝗡 𝗞𝗨𝗠𝗜𝗡𝗔𝗛 𝗛𝗔𝗥𝗦𝗔𝗧𝗡𝗔 𝗧𝗔𝗪𝗞 𝗧𝗔𝗪𝗛 :
District Child Protection Unit Staff-te leh Juvenile Justice Board Member-te chu an hnathawh thlirletin R. Lalrinchhani, DCPO kaihruaiin an thukhawm.
He thutkhawmah hian JJB Champhai chuan Kumin January atang khan Case 17 ngaihtuahin an ching fel tawh tih tarlan a ni a. Naupang pawikhawihnaah hian - Ruk
ruk, Mipat hmeichhiatnaa pawi khawihna, ND&PS Act bawh chhiatnate chu a langsar zualte a ni.
District Child Protection Unit, Champhai chuan kumin January - August chhung khan Champhai District chhunga hmun hrang hrangah Awareness vawi 13 neiin, Capacity Building vawi 5 leh Sensitization vawi 19 an nei a. August thla khan East Tuipui biala naupang lirnghing tuarte chu District Child Protection Unit, Champhai te hian an tlawh bawk a ni.
Kumin January atanga August thla thleng khan Child Welfare Committee chuan case 20 an dawng tawh a, naupang pawngsual tawk leh hur sualna lama naupang khuaikhem tawk 12, naupang kut tuar 2, retheih vanga naupang harsatna tawk 3 leh mahni In atanga tlanbo 3-te chungchang chin fel a ni a. Juvenile Justice Board pawhin case hrang hrang 17 an ching fel tawh tih tarlan a ni bawk.

𝗕𝗔𝗪𝗥𝗛𝗦𝗔𝗣 𝗜𝗡 𝗗𝗜𝗦𝗧𝗥𝗜𝗖𝗧 𝗞𝗛𝗨𝗔 𝗧𝗟𝗔𝗪𝗛𝗖𝗛𝗛𝗨𝗔𝗛 𝗩𝗘𝗞 𝗧𝗨𝗠 :
Champhai District Bawrhsap Maria CT Zuali chuan District khuate a theih ang anga tlawh chhuah vek a tum tih sawiin, khawtlang hmasawnna atana hmalak dan turte khawtlang hruaitu thlan tharte leh NGO hruaitute sawipui a, mitthla a lang thei tura a hmun ngeia tlawh kual a nih thu a sawi.
Nimin khan Champhai Bawrhsap Maria CT Zuali hian District chhung khaw hrang hrang Tualcheng, Lungphunlian leh Hnahlan khuate tlawhin, khawtlang hruaitute a kawm a, khawtlang hmasawnna tura hmachhawpte leh hmalak dan turte a sawipui a ni. Bawrhsap chuan MGNREGS, FOCUS leh Sawrkar scheme hrang hrang hmanga hmasawnna tluantling leh chhawrnahawm tak siam a nih theihna tura hmalak tum a nih thu sawiin, District chhunga hmasawnna ruhrel siamna tura Sawrkar duan scheme hrang hrangah Chairman a nih angin khaw mite mamawh leh thatpui tur thilte sawipui tura tlawhkual a nih thu a sawi a. MGNREGS kaltlangin khaw tin atanga chawikan ngai zual thlan chhuah chhungkaw 5 theuhte thlanga eizawnna ngelnghet an neih theihna tura chhawmdawlna leh kaihhruaina pek tum a nih thu sawiin, hmasawnna rualkhai mitin thleng pha siam tum a ni, a ti.
Champhai District mipui te chu hriselna ngai pawimawh fo thin tura chahin, pawnlera inthiar awm lohna District-a puan a nih tawh avangin chenna hnaivai lutuka Ran In, zun leh ekte a awm lohna turin mihring hriselna ngaipawimawh chung zela ran vulh hna kalpui thiam turin a fuih a. Hmasawnna chu thil lian leh sum tam tak keng tel a ni kher lo a, mimal leh khawtlang nun hrisel neih leh intodelhna kawnga hlawhtlinna chan chu a tehna pawimawh tak a ni, a ti a.
Mahni kut ke ngeia ding thei tura thiamna tuh tura hmalak chu a ngaihpawimawh thu sawiin, hmasawnna tak tak thlen tur chuan nun hrisel zawk neih hnua intodelh tuma theihtawp chhuah a tul thu a sawi bawk.
Khawtlang hruaitute hnen atanga khawtlang mamawh leh harsatna thlente a tul ang zela bawhzui sak a tum tih hrilhin, mahni ke ngeia ding thei tura tan la turin a chah a. Khualzin hmanga sum lakluh a nih theihna tura theihna nei tam zual khuate chu an theih ang tawka faina nunpui tura fuihin, khualzip hip thei tur hmunhma hrang hrangte a tlawh bawk a ni.

𝗛𝗥𝗜𝗣𝗨𝗜 𝗞𝗔𝗜 𝗟𝗔 𝗛𝗠𝗨𝗟𝗢, 𝗛𝗥𝗜𝗞𝗔𝗜 𝗣𝗔𝗞𝗛𝗔𝗧 𝗖𝗛𝗛𝗨𝗔𝗞 𝗗𝗔𝗪𝗡 :
Ningani-a Champhai-a Sample endik zingah Covid-19 hri kai an awm lo va, hrikai enkawl mek enkawl dam a ni ta bawk.
Ningani khan Champhai District chhungah Covid-19 kai leh kai lo Sample 30 endik a ni a, heng Sample-te hi Rapid Antigen Test hmanga endik niin, hri kai an awm lo
vek a ni. Heng Sample endikte hi Myanmar atanga rawn kir leh District pawn atanga rawn hawte an ni a.
TrueNat Laboratory-a Sample endik 15 result erawh chu nghah mek a ni a. Covid Care Centre-a hri kai enkawl mek sample ZMC-a Lab-a endik nawn pawh Covid-19 a kai tawh lo tih finfiah niin, vawiin hian CCC atangin a chhuak ang. Heti hian Champhai District chhungah Rapid Antigen Test hmangin Sample 442 endik tawh niin, TrueNat Laboratory-ah Sample 22 endik a ni tawh bawk a.
ZMC leh Silchar-a thawn tawh zawng zawng nen Sample 1940 endik a ni tawh a. Tunah hian State pawn atanga rawn haw zingah mi 11-te Sample la lak loh niin, heng mite hi Champhai an rawn thlen atanga ni 5 hnuah sample lak a ni ang.

𝗞𝗛𝗨𝗡𝗚 𝗛𝗥𝗔𝗡 𝗭𝗔𝗧 :
Nimin khan Champhai District Quarantine Facilities-ah mipa 1 luh belh lehin, tun dinhmunah Champhai District chhunga Sawrkar hriatpui Quarantine Centre-ah mi 45 an awm mek.
DPRC Quarantine Centre Keifangtlang-ah mi 25, mipa 19 leh hmeichhe 6 khung hran mek an ni a. Tourist Lodge Quarantine Centre-ah mi 16, mipa 13 leh hmeichhia 3 khung hran mek niin, CCC Nursing School
Building-ah mipa 2 enkawl mek an ni bawk a. Champhai District-a khung hrante hi mipa 36 leh hmeichhia 9 an ni.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Ningani khan Mizoramah hrileng laka invenna dan, Mizoram (Containment and Prevention of Covid-19) Ordinance 2020 bawhchhia mi 129 man an ni.
Puipunna hmuna hmaituamna vuahlo mi 114 man an ni a, inkar hlata awmlo mi pariat man niin, vantlang hmuna chil chhak pakhat man a nih bakah inkaihhruaina dan dang zawmlo mi 6 man an ni bawk.
Mi mante atanga pawisa chawi tlingkhawm hi a vaiin Cheng 19,300 a ni. Champhai district-ah chuan Ningani khan vantlang hmuna hmai tuam lo mi 5 man an ni a. 

𝗟𝗜𝗥𝗧𝗛𝗘𝗜 𝗧𝗛𝗔𝗥 68 𝗭𝗜𝗔𝗞 𝗟𝗨𝗧 :
August thla chhung khan DTO Office, Champhai-ah lirthei 68 - two wheeler 32, Auto Rickshaw 6, Car 11, Taxi 9, bungraw phur chi 8 leh JCB 2 ziahluh thar a ni.
August thla vek khan mihring phur chi lirthei atangin Chhiah Cheng 48,700 hmuh a ni a, bungraw phur chi lirthei atangin Cheng 1,32,900 hmuh niin, road tax-ah Cheng 5,84,504 hmuh a ni a. MV Fee atangin Cheng 5,04,650 hmuh a ni a, Compounding Fee-ah Cheng 15,100 leh Parking Fee atangin Cheng 47,801 hmuh a ni bawk. August thla chhunga District Transport Office-a chhiah hrang hrang lut tling khawm hi Cheng 13,33,655 a ni.

𝗞𝗔𝗪𝗡𝗚 𝗟𝗔𝗜𝗛 𝗔𝗩𝗔𝗡𝗚𝗜𝗡 𝗟𝗜𝗥𝗧𝗛𝗘𝗜 𝗧𝗟𝗔𝗡 𝗛𝗨𝗡 𝗦𝗜𝗔𝗠 :
Khawzawl - Biate kawng zauh hna sawt zawka thawh a nih theih nan leh lirthei veivakte him zawk nan Khawzawl District Magistrate Zothanmawia chuan lirthei tlan theih loh hun chhung tur a bithliah a. He ruahmanna hi September Ni 18, 2020 atanga October Ni 15, 2020 thleng kalpui a ni ang. Lirthei hi zing dar 9:00 atanga chhun dar 1:00; chawhnu dar 3:00 atanga tlai dar 5:00 leh zan dar 7:00 atanga a tuk zing dar 6:00 thleng helai kawngah hian lirthei tlan tlang theih a ni lo ang.

𝗞𝗛𝗔𝗪𝗧𝗟𝗔𝗡𝗚𝗜𝗡 𝗖𝗛𝗘𝗡𝗡𝗔 𝗧𝗨𝗥 𝗜𝗡 𝗦𝗔𝗞 𝗦𝗔𝗞 :
Chalrang khawtlang chuan an khuaa nupa reka khawsa, kum 70 chuang ve ve, ram hna thawk thei tawh lote chu In an saksak.
In hi a chung rangva, a bang Tile, a chhuat lei, Cement a zut hnan, a dung Feet 24 leh a vang Feet 12-a zauin an sa a. Bialtu MLA, Tawnluia chuan In chung tur Rangva hi tumsakin, In sakna bungrua leh chak dangte hi mi thil phalte'n an thawh khawm a ni.
In hi tunkar Thawhlehni atang khan sa tanin, nimin khan zawh fel a ni a; in saknaah hian tha 320 vel senral a ni. Chalrang Branch YMA hian in saknaa tha thawhtute leh thil pek petute zawng zawng chungah lawmthu an sawi tih thuchhuah siamin an tarlang a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…