Skip to main content

Ni 25.9.2020 (Zirtawpni) Champhai Tualchhung

𝕹𝖎 25.9.2020 (𝖅𝖎𝖗𝖙𝖆𝖜𝖕𝖓𝖎) 

𝗠𝗜𝗣𝗨𝗜𝗧𝗘 𝗛𝗜𝗠𝗡𝗔 𝗧𝗨𝗥 𝗕𝗔𝗪𝗥𝗛𝗦𝗔𝗣-𝗜𝗡 𝗧𝗛𝗨𝗣𝗘𝗞 𝗖𝗛𝗛𝗨𝗔𝗛 :
District Magistrate Maria CT Zuali chuan kawngpui tihnawk zawnga bungrua dah lo turin thupek a chhuah.
Thupek a tarlan dan chuan Champhai District chhunga khaw hrang hrangah vantlang kawng nek chep zawnga mimal bungrua hrang hrang dah hnawk an awm a. Hei hian lirthei che vel leh mihring tan pawha hnawk leh harsatna a siam bakah, sorkar Dan dinglai, Mizoram PWD Manual leh Revenue Department hriattirna, kawngpui atanga metre 3 aia hnaia in sak leh bungraw dah hnawk khapna kalh tlat a ni a.
Chuvangin Champhai District chhunga lirthei che vel leh mihring him tlanna turin kawngpui tichep zawngin mi tumahin thingkhawn emaw thingfak, insakna bungrua, boulder, tuizem, motor leh motor hlui leh chhia te dah loh tur a ni a. Heng tarlan tak hmanga kawngpui tichepa dahtute chuan he thupek chhuah ni 21.9.2020 atanga chhiara thla khat chhunga senghawi vek tura hriattir an ni a. Kawngpui sira motor hung thin te pawhin senghawi tur a ni a, thla khat chhungin motor In (Garage) an nei vek tur a ni ang.

𝗔𝗗𝗗𝗟. 𝗗𝗖 𝗧𝗛𝗟𝗔𝗛 𝗡𝗔 𝗛𝗨𝗡 𝗛𝗠𝗔𝗡𝗚 :
Nimin chawhnu dar 3:00 khan Champhai Officers' Club (COC) chuan an member hmun danga insawnte pawl hminga an thlah thin angin Aizawla insawn tur Mark Lalthanliana, Addl DC chu a Pisa-ah an thlah.
Thlahna hun hi P.Lalhmingliana, Vice President, COC chuan a kaihruai a. Dr. B. Zonghinga, Executive Committee Member in ngaihhruina thuziak a hlan a. George Lalthanngura, Executive Committee Member in thlahna leh duhsakna thuchah a sawi a ni. Mark Lalthanliana chuan Champhaia hun a hman chhungin thawhhona tha tak leh tawiawmna a dawn avangin lawmthu a sawi a. COC kal zelna turah duhsakna a hlan a ni.
Mark Lalthanliana hian Administrative Training Institute (ATI), Aizawlah Joint Director hna a chelh dawn a. R.Lalnghakliana, Project Director, DRDA Champhai chuan a hna chelh lai bakah Addl DC Champhai hna hi a kawp rih dawn a ni.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Nilaini khan Champhai Police Flying Squad-te chuan Inkharkhipna dan bawhchhia, vantlang hmuna hmai tuam lo mi 12 an man a, Cheng 100 theuh chawi tir an ni.

𝗞𝗛𝗨𝗡𝗚𝗛𝗥𝗔𝗡 𝗭𝗔𝗧 :
Champhai-ah State pawn atanga lo haw mi 29 khung hran mek an ni. Nimin khan khung hran lai mi 10, mipa 6 leh hmeichhia 4-te chuan inkhung hran hun chhung an hman zawh tawh bakah Covid-19 an kai lo tih finfiah an nih avangin khunghranna hmun atanga chhuahtir an ni a. State pawn atangin mi 3, mipa 1 leh hmeichhia 3-te an rawn thlen belh bawk.
Nimin tlai thleng khan Champhai District chhunga Sawrkar hriatpui khunghranna hmunah mi 29 an awm mek a. DPRC Quarantine Centre Keifangtlangah mi 8, mipa 6 leh Hmeichhe 2 khung hran mek an ni a; Tourist Lodge Quarantine Centre-ah mi 18, mipa 16 leh hmeichhia 2 khung hran mek an ni bawk a, In lamah mipa pahnih an inkhung hrang mek a. Covid Care Centre-ah mipa 1 enkawl lai a awm mek bawk a ni. 

𝗛𝗥𝗜 𝗞𝗔𝗜 𝗛𝗠𝗨𝗛 𝗕𝗘𝗟𝗛 𝗟𝗔 𝗔𝗪𝗠𝗟𝗢 :
Nilaini khan Champhai District Hospital TrueNat Laboratory-ah Sample 5 endik niin, hri an kai lo vek a, Rapid Antigen Test hmanga Sample endik erawh a awm lo thung. TrueNat-a sample endikte hi State pawn atanga rawn haw, khunghranna hmuna awm lai leh, Covid Free Certificate neih duh leh District pawn atanga rawn haw an ni.
Heti hian TrueNat Laboratory-ah Sample 55 endik tawhin, Rapid Antigen Test hmangin Sample 446 endik a ni tawh bawk a. ZMC leh Silchar-a thawn tawh zawng zawng nen Sample 1,975 endik a ni tawh a. Nilaini-a ZMC-a sample endik zingah Champhai atanga sample 6 tel ve te chuan hri an kai lo tih finfiah a ni a. Heti hian Champhai-ah Covid-19 kai hmuhchhuah mi 17 awm tawhin, mi 16 enkawl dam an ni tawh a; Covid Care Centre-ah mipa pakhat enkawl lai a la awm mek a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…