Skip to main content

Ni 28.9.2020 (Thawhtanni)

𝗧𝗛𝗔𝗟 𝗙𝗔𝗩𝗔𝗡𝗚 𝗞𝗨𝗧 𝗛𝗠𝗔𝗡𝗚 :
Inrinni khan Champhai District Jail-ah Thal favang Kut hman a ni a; Lalhmingmawia Pachuau, MJA Champhai District President chuan khual lian niin a hmanpui.
He hun hi Lalthanliana, GS, PWC chuan a kaihruai a. Khuallian, Lalhmingmawia Pachuau chuan thu sawiin, MJA an nih angin District Jail chu an ngaihven reng thin tih a sawi a. Ri duhawm lo engmah hriat tur a awm lo thin chu jail tangte'n hotute thu an awih vang a nih thu leh lawmawm a tih thu a sawi a. Jail-a an awm chhungin kawng khatah tal hlawhtlinna thuruk chhar chhuak turin a chah a. Jail atangin mi tam takin lehkha an zir chhuah tawh thu leh kut themthiamna lamah pawh hmasawnna atan an hman thin thu sawiin, infiamna lamah pawh mi tam tak chu Jail atangin an inzir chhuah tawh thu leh Olympic-ah medal la pha hial pawh an awm thu a sawi a. Thenkhat chu lehkhabu tha te chhiarin lehkha ziah lamah te an inchher hriam a, Bible te zirin, a ziah hial an ziak chhuak tawh thin tih sawiin, an nun thlak danglam leh zahawm takin Jail chu an chhuahsan thei tih a sawi a ni.
Khuallian chuan Jail chu misualte khungkhawmna a ni satliah lo va, inzirna hmun leh insiam thatna hmun a nih thu sawiin, Jail atanga mi tam takin hlawhtlinnna an lo chhar tawh chu anni pawhin an chhar ve theih reng tih a sawi bawk a. Thawk rim chuang si lova hausak thut duhna te, sawrkar duh loh zawng tih te leh rilru kal sual avanga ruih hloa tlan te hi bansan tur chuan ngaihtuahna ngelnghet leh tum chiang tak neih a ngaih thu te sawiin, Bible-in thawk lo chuan ei pawh ei suh se a tih ang a, taima tak leh rinawm taka awm a ngaih thu leh taihmakna leh rinawmna kan tlakchham thin avanga heng sual hi khawih ta thinin, Jail tan a ngaih phah thin a ni, a ti a. Thalfavang Kut chibai bukin, District
Jail Superintendent hnenah 'Genting Highlands' tih lehkhabu a hlan nghal bawk a ni. Thalfavang Kutah hian Jail tangte atangin zai ngaihthlak a nih bakah item chi hrang hrang hmanga intihhlimna neih a ni a. R. Lalnunkimi, District Jail Superintendent pawhin thu sawiin, tlai lamah ruai kil ho nghal a ni bawk.
Champhai District Jail-ah hian Jail tang mi 102 awm mekin, mipa 94 leh hmeichhia 8-te an ni a. Convict mi 11 an awm mek bawk.

𝗡𝗔𝗨𝗣𝗔𝗡𝗚 𝗞𝗨𝗠 𝗧𝗟𝗜𝗡𝗚𝗟𝗢 𝗞𝗛𝗔𝗪𝗜𝗛 𝗧𝗨 𝗝𝗔𝗜𝗟 𝗕𝗔𝗡𝗚 𝗭𝗨𝗧 :
Naupang kum tling lo laka mawi lo taka mipat hmeichhiatna hmanpui a puh C.Lallianpuia s/o Tlangkhuma (fam) Champhai Venglai chu man niin, hemi chungchang thubuai hi Champhai Police te chuan an chhui zui mek a, hemi chungchangah hian C.Lallianpuia hi nimin khan District Jail, Champhai-ah dahluh a ni tih thu dawn a ni a.
He thil thleng chungchangah hian Champhai Vengthar VC, YMA leh MHIP chuan thuchhuah intawm siamin, hetiang thil tha lo hi an dem tak zet tih sawiin, hetiang hmeichhe kum tlinglo chunga mawilo taka a khawsak avang hian a chungah dan ang taka a phu tawk hremna a hmuh ngei an phut a; hetiang thil tha lo hi tun hnuah thleng tawh lo se an duh tih an thuchhuahah chuan an tarlang tel bawk.

𝗥𝗜𝗟𝗥𝗨 𝗟𝗘𝗛 𝗧𝗔𝗞𝗦𝗔 𝗛𝗥𝗜𝗦𝗘𝗟 𝗡𝗔 𝗭𝗜𝗥𝗧𝗜𝗥 :
Nimin khan District Sports & Youth Office (DSYO) Champhai bultumin rilru leh taksa hrisel siam kawnga inzirtirna Cardio and Fitness Training Session chu District Jail-ah buatsaih a ni.
Champhai DIPRO Dr Lallawmkima chuan District Jail-a awmte rilru leh taksa hriselna tur ngaihtuaha Cardio and Fitness Training Session buatsaih a ni chu lawmawm a tih thu a sawi a. Jail-a awmte chu lungngain indawmkun mai lovin taksa leh rilrute tichak sauh sauha nun bul tha tak tan tum tur leh insiamthatna atana hman tum turin a chah a. Chhungkua, kohhran, khawtlang leh ram tana chhawrtlak leh innghahna tlak nih tum tura fuihin, taksa sawizawi kawnga mithiamte hnen atanga zirtirna pek tur chu ngaithla liam mai lova a taka nunpuia midangte hnena hrilhchhawngtu nih tum theuh turin a chah a ni.
He hun hi Obed Lalmalsawma, DSYO Champhai chuan a kaihruai a. Taksa
sawizawi lam thiam ten Jail tangte hi zirtirna an pe a ni.

 𝗖𝗢𝗔𝗖𝗛𝗜𝗡𝗚 𝗖𝗟𝗔𝗦𝗦 𝗛𝗔𝗪𝗡𝗚 𝗩𝗘 𝗧𝗨𝗥𝗜𝗡 𝗠𝗭𝗣 𝗜𝗡 𝗡𝗚𝗘𝗡 :
MZP Hqrs, Champhai chuan IAS Offline Coaching Class, Champhai District tana hawnsak ve turin Mizoram Youth Commission hnenah lehkha ziakin, ngenna an thlen.
Mizo thalaite'n nasa taka hma an sawn theihna tur atana Aizawl, Lunglei, Siaha leh Kolasib-ahte MYC-in ALS Coaching Academy, New Delhi nen tangkawpin IAS Offline Coaching Class nei thei tura ruahmanna a siam chu MZP Headquarters, Champhai chuan lawmawm a tih thu lehkhaah hian tar langin, khaw chhak lama Mizoram Khawpui, Champhai hmaih a ni erawh chu pawi an tih thu an tarlang tel bawk a.
Hemi chungchangah hian MZP Headquarters, Champhai chuan Champhai District chhunga zirlaite'n Mizoram leh Central hnuaia hna awmte an thawh ve theihna tur atana inbuatsaihna hmun Coaching Centre, hmun dang ruala Class tan ve hman ngei tura hawn sak ve turin Mizoram Youth Commission an ngen a. IAS Coaching Centre bakah hian MYC hnuaia hmalakna awm zawng zawng, sipai lak tur chungchangah te pawh Champhai hi Centre pawimawh leh puitling a nih theih nana hma laksak a, an mamawh ang hmanruate pawh chhawp hnaihsak turin ngenna an thlen a ni.

𝗥𝗨𝗥𝗔𝗟 𝗕𝗔𝗡𝗞 𝗟𝗨𝗔𝗡𝗚𝗖𝗛𝗛𝗨𝗔𝗞 :
Nimin kha Mizoram Rural Bank din champha, a kum 38 tlin ni a ni a. Nimin kha Pathianni a nih avangin vawiinah he ni pual hian hun an hmang dawn a, an customer te duhsakna chibai an buk a ni. Vawiin hian an din champha pualin TNT Zuangtui-ah Rs.80,000/- Champhai TNT, Lunglei TNT leh Kolasib TNT ah te Rs. 40,000/- theuh an pe dawn niin thu kan dawng bawk.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Inrinni khan Champhai Police-te chuan Inkharkhipna dan bawhchhia, vantlang hmuna hmai tuam lo mi 12 an man a, Cheng 100 theuh chawitir an ni. Inrinni thleng khan Champhai district chhungah inkharkhipna dan bawhchhia mi 1488 man an ni tawh a, an pawisa chawi hi a vaiin Rs. 2,65,600 a tling tawh a ni.


𝗞𝗛𝗨𝗡𝗚𝗛𝗥𝗔𝗡 𝗭𝗔𝗧 :
Champhai district-a sorkar hriatpui khunghranna hmunah mipa 40 leh hmeichhia 7, an vaiin 47 khung hran mek an ni.
DPRC Institutional Quarantine Centre, Keifangtlangah mipa 20 leh hmeichhia 5, mi 25; Tourist Lodge Institutional Quarantine Centre-ah mipa 17 leh hmeichhia 2, mi 19 khung hran mek an ni a.
Covid Care Centre (CCC), Nursing School Building-ah mipa 3 khung hran mek an ni bawk.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…