Skip to main content

Ni 30.9.2020 (Nilaini)

𝗔𝗜𝗭𝗔𝗪𝗟 𝗞𝗔𝗪𝗡𝗚 𝗭𝗔𝗨𝗛𝗡𝗔 𝗧𝗨𝗥𝗜𝗡 𝗥𝗔𝗠 𝗡𝗘𝗜𝗧𝗘𝗡 𝗣𝗔𝗦𝗦 𝗧𝗛𝗘𝗛 𝗟𝗨𝗛 𝗧𝗨𝗥 :
Addl. DC & CALA Champhai District R.Lalnghakliana chuan Tuipui leh Champhai inkar kawngpui kama ram neite an pass, DC Office-a theh lut turin hriattirna a ti chhuak.
Seling leh Champhai inkar 2 Lane-a siam turah he kawngin Champhai District chhung (Km 130 - Km 147.250) a paltlang tura mimal, pawl leh Sorkar Dept-te ram zawng zawng enfiaha teh fel tur a nih avangin Tuipui leh Champhai inkar kawngpui kama ram nei zawng zawngte'n an pass neih ang ang Xerox Copy (attested) Sorkar-ah theh luh tur a ni a. Tuipui leh Chhungte chuan anmahni VCP kal tlangin DC, Champhai hnenah theh luh tur a ni a; Champhai-a chengte chuan DC Office, Champhai-ah chawlhkar hnih chhungin theh luh tur a ni ang.

𝗣𝗔𝗪𝗡𝗚𝗦𝗨𝗔𝗟 𝗩𝗔𝗡𝗚𝗔 𝗣𝗔𝗪𝗟 𝗛𝗥𝗔𝗡𝗚 𝗛𝗥𝗔𝗡𝗚 𝗧𝗛𝗨𝗖𝗛𝗛𝗨𝗔𝗛 𝗟𝗘𝗛 𝗙𝗜𝗥

𝗠𝗛𝗜𝗣 𝗦𝗨𝗕 𝗛𝗤𝗥𝗦 𝗖𝗛𝗔𝗠𝗣𝗛𝗔𝗜 :
MHIP Sub Hqrs Champhai chuan naupang Kum tlinglo pawngsualtua puh C. Lallianpuia chungah a na thei ang bera hremna lekkhawh turin thuneitute an phut tih thuchhuah siamin an tlarlang.
MHIP Sub Hqrs Champhai thuchhuaha tarlan a nih danin September ni 26, 2020 Inrinni tlaia hmeichhe naupang kum 5 miin C Lallianpuia, Tlangkhuma(L) fapa Champhai Venglai in a pawngsual nia a puh chu MHIP Sub Hqrs Champhai chuan lungchhiat thlak a ti hle tih tarlangin "Kan ram, kan khawtlang leh kan veng ngeiah hmeichhiate, naupang chumchiap chena kan him ta lo hi kan lungawi lo tak zet a ni" an ti a. He thil thleng avang hian tu leh fa hmeichhia neite an ralmuang ta lo tih sawiin Hetianga kum 5 tak ngial pawh pawngsual duha puh C Lallianpuia chu a rang thei ang bera a chungah Action lak a, a na thei ang bera hremna lek kawh turin thuneitute an phut tih sawiin hetiang thil rapthlak tak hi thleng nawn tawh lo se an duh takzet tih an sawi bawk.
MHIP Sub Hqrs hian an thuchhuah hi Education Minister, Law & Judicial Minister, Vice Chairman Health & family Welfare Board, Champhai DC leh SP, Additional District & Session Judge, Medical Superintendent District Hospital Champhai, District Child Protection Officer leh Chairman, Child Welfare Committee, MJA Champhai leh MHIP Sub Hqrs Adviser te chu a tul anga an thuchhuah hriatpuia hma lak pui turin a copy an pe theuh bawk a ni.
Vawiin khan MHIP Sub Hqrs Champhai chuan he pawikhawihna tuartu chhungkuate hi tlawhin Hmeichhe naupang thla hualna turin Rs 2,000 a pe a ni.
=======================
𝗩𝗘𝗡𝗚𝗧𝗛𝗔𝗥 𝗩𝗖, 𝗠𝗛𝗜𝗣 𝗟𝗘𝗛 𝗬𝗠𝗔 :
Vengthar khawtlang chuan naupang kum tling lo laka mawi lo taka khawsa lakah hremna pe tura an phut thu thuchhuah siamin an tarlang.
Champhai Vengthar YMA Branch, MHIP leh VC te chuan thuchhuah intawm siamin September ni 26, Inrinni tlaia hmeichhe naupang pakhat kum 5 mi chunga mawi lo taka khawsa C Lallianpuia s/o Tlangkhuma (L) Champhai Venglai chu an dem tak zet tih an sawi a, Hetianga hmeichhe naupang kum tling lo chunga mawi lo taka a khawsak avang hian a phu tawk hremna a hmuh ngei an phut thu leh hetiang thil tha lo hi Champhai Vengthar huam chhungah  thleng tawh lo se an duh tih an sawi bawk.
=======================
𝗠𝗜𝗭𝗢 𝗭𝗜𝗥𝗟𝗔𝗜 𝗣𝗔𝗪𝗟 𝗛𝗤𝗥𝗦. 𝗖𝗛𝗔𝗠𝗣𝗛𝗔𝗜 :
MZP Hqrs. Champhai chuan thuchhuah siamin tun hnaia Champhaia kum tlinglo naupang chunga mawinlo taka khawsa chu a hna atanga Suspend thuai turin School Education Dept an phut thu an sawi 
MPZ Hqrs Champhai thuchhuaah tarlan a nih dani  Pu C. Lallianpuia s/o Tlangkhuma (L) Champhai Venglai in Dt. 26th Setptember 2020 (Inrinni) a an zirlailaipui hmeichhe naupang kum 5 mi chunga mawilo taka a che hi Mizo Zirlai Pawl Champhai Headquarters chuan pawi an tiin an dem takzet tih sawiin dan anga na taka hrem ngei turin thuneitute an phut tlat thu an sawi a. Pawikhawhtu Pu C Lallianpuia chu a thawhna School Education Department pawhin Suspend thuai turin an phut tlat tih an tarlang bawk.
An zirlaipui te chungah hetianga mawilo tak a chetna hi MZP Hqrs. Champhai chuan thleng nawn tawh lo hram se an duh takzet tih thuchhuahah hian an tarlang tel bawk.
=======================
𝗭𝗢𝗠𝗜 𝗖𝗨𝗟𝗧𝗨𝗥𝗔𝗟 𝗦𝗨𝗕-𝗛𝗤𝗥𝗦, 𝗖𝗛𝗔𝗠𝗣𝗛𝗔𝗜 :
Zomi Cultural Sub Headquarters Champhai chuan kum tling lo pawngsualtu chu a phu tawk hremna pe ngei turin thuneitute an phut tih thuchhuah siamin an tarlang.
Tukin khan Zomi Cultural Sub Headquarters Champhai chu hemi chungchangah hian an thukhawm a, ni 26 a Pu C. Lallianpuia, Champhai Venglaiin naupang kum tling lo a pawngsual a, cheng nuaih khat hmanga a thianghlimna lei sak a tum chu an dem takzet tih an tarlang a, hemi chungchangah hian Vengthar NGO te an thlawp tlat thu an tarlang bawk. 
Thukhawm chuan pawngsual tu Pu C. Lallianpuia chu a chungah Dan dik tak kengkawh tur leh a phu tawk hremna pe ngei turin thu nei tute an phut thu thuchhuahin an tarlang a ni.
=======================
𝗩𝗘𝗡𝗚𝗧𝗛𝗔𝗥 𝗕𝗥𝗔𝗡𝗖𝗛 𝗬𝗠𝗔 𝗙𝗜𝗥 : 
He thil thleng chungchangah hian  September ni 26 Inrinni khan Champhai Vengthar YMA Branch hruaitu pakhat  chuan Champhai Police Station-ah FIR a theh lut a, FIR a thehluha tarlan a nih danin Semptember ni 26 Inrinni tlai Dar 5:00 leh 6:00 inkar velah Pu C Lallianpuia s/o Tlangkhuma (L) Venglai Champhai chuan Leilet kamah Hmeichhe naupang pakhat a lo pawngsual nia an hriat thu leh he thil thleng hi tha lo an tih thu ziakin he pawikhawihna tuartu chhungte'n khawtlang hruaitute kutah engkim an dah avanga an aiawha FIR theh lut an nih thu leh hemi chungchanga hi chhuisaka dan anga action laksak turin an ngen a ni.

𝗡𝗨 𝗟𝗘𝗛 𝗡𝗔𝗨𝗧𝗘 𝗧𝗛𝗜 𝗔𝗡 𝗧𝗟𝗘𝗠 𝗗𝗔𝗡 𝗧𝗨𝗥 𝗭𝗜𝗥𝗛𝗢 :
Nu raicheh a thi leh nau pianghlim thi tih tlem nana sawrkar laipui scheme Janani Suraksha Yojana leh Janani Shishu Suraksha Karyakram chungchang inzirtirna nimin khan I&PR Conference Hall, Champhaiah neih a ni.
JSY leh JSSK chungchang zirtirna hi Champhai District a damdawi in hrang hranga thawktute tana buatsaih a ni a. Hun kaihruaitu CMO Dr R. Lianmawia chuan Scheme hamthatna chu nu nau nei turte tan damdawi in an kalna senso tum sakte a nih avangin, a dawng tur dik tak ten JSY leh JSSK fund an dawn theihna
tura an mawhphurhna hrechiang turin a chah a.
Lalrintluangi, DAM chuan JSY leh JSSK chu nu nau nei turin sorkar emaw mimal damdawi inah nau a nei a nih chuan a senso zawng zawng, damdawi man leh damdawi in a panna senso te JSSK Fund atangin a dawn leh theih thu a sawi a. JSSK chuan mahni sum seng lova nu in nau him dam taka a neih chu a tum a nih thu a tarlan rualin, JSY chuan nu in nau dam leh him taka damdawi inah a nei a nih chuan lawmman a pek thin thu a sawi.
Chhinchhiahna hnuhnungber atanga a lan danin Champhai District chhungah mi 1,38,343 awm mekin, District Hospital 1 a awm a, Community Health Centre 2 awmin, Primary Health Centre 11 a awm a, Sub Centre 59 awmin, Sub Centre Clinic 24 a awm bawk.

𝗙𝗔𝗥𝗞𝗔𝗪𝗡 𝗞𝗔𝗪𝗡𝗚 𝗦𝗜𝗔𝗠 𝗧𝗛𝗔𝗧 𝗔 𝗡𝗜𝗛 𝗧𝗛𝗘𝗜𝗛 𝗗𝗔𝗡 𝗧𝗨𝗥 𝗡𝗚𝗔𝗜𝗛𝗧𝗨𝗔𝗛 :
BRTF Road Dungtlang atanga Samthang leh Vaphai tan tlanga Farkawn panna kawngpui siam that a nih theihna tur chungchang relin nimin khan Champhai Bawrhsap, Maria CT Zuali hovin Tuipuiral Zirlai In, Dungtlang-ah inrawnkhawmna hun hman a ni.
Maria CT Zuali chuan Champhai District-ah kawngpui tha leh felfai nei tura tan lak zel a nih thu sawiin, Dungtlang atanga Farkawn panna kawng siam that thuai a nih theihna tura inrawn khawmna hi buatsaih a nih thu a sawi a. Khawtlang hruaitu kalkhawmte chu kawngpui enkawl uluk tur leh khaw fai tak siam tuma tan la sauh sauh turin a chah a. Village Council thlan tharte chu Bawrhsap aiawha mahni khua theuhah rorel thiam turin a chah bawk.
Bawrhsap chuan sumin a lei sen loh leilung hausaknate ngai hlu a, vawnghim turin khaw mipui te an pawimawh thu sawiin, tui hna siamtu pawimawh tak ramngaw ti chereu mai lova venhim tlat tum turin a fuih a. Nungcha leh ramngaw humhalh kawngah tan la a, khualzin hip thei tura tan la zel turin a chah bawk.
Lalduhthlana, DFO Champhai chuan Dungtlang leh Farkawn inkar kawng siam tur avanga ramngaw tihchhiat tur chhut chhuah chu Hectare 57 a zau, Farkawn Site Allotment Boardin Compensatory Afforestation (CA) atan an ramchhung Sihdarh ramah an pek thu a sawi a. CA atan ram bua, ramngaw a siam tur an duh thin thu a sawi bawk.
Hmasawnna ken tel thilte siam kawngah ramngaw tihchhiat a ngaih chang a awm thin a, Forest leh Environment Clearance neih hmasak a tul thu sawiin, Forest Conservation Act leh Environmental Protection Act hmanga dil thin a nih thu a sawi bawk.
Thukhawm chuan Farkawnhuam chhung, Sihdarh rama Compensatory Afforestation (CA) tura Farkawn Site Allotment Board-in a pek ram hectare 57 a zau chu a hmunah DFO hova endik ni se, a ti a; thutkhawm zawh hnu hian enfiah tura tihte chu an kal nghal a ni.

𝗧𝗥𝗨𝗘𝗡𝗔𝗧 𝗞𝗛𝗔𝗪𝗟 𝗛𝗔𝗪𝗡𝗚 𝗗𝗔𝗪𝗡 :
Lab hawng dawn Medical Operational Team on COVID-19 Leader Dr. ZR Thiamsanga, MLA chuan nizan khan Aizawl atangin Champhai rawn thlengin, vawiin chawhma dar 11:00 hian One Stop Centre Building, Vengsang a mi chu a hawng ang a; chhun dar 12:00 ah District Hospital, Champhai-a TrueNat Laboratory chu a hawng ang.
Naktuk chawhma dar 11:00 ah Clean, Beautiful & Healthy Champhai Town thutkhawm, DC Conference Hall-a neih turah a telang a. Chawhnu lamah DC nen Champhai khaw chhung hmun pawimawhte an fang kual ang. 
October ni 2-6 chhungin a bial chhung a fangkual ang a, ni 7.10.2020 ah Aizawl panin a kir thla leh ang.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Thawhtanni khan Champhai Police-te chuan Inkharkhipna dan bawhchhia, vantlang hmuna hmai tuam lo mi 2 an man. 

𝗡𝗔𝗨𝗣𝗔𝗡𝗚 𝗖𝗛𝗔𝗡𝗩𝗢 𝗩𝗘𝗡𝗛𝗜𝗠 𝗖𝗛𝗨𝗡𝗚𝗖𝗛𝗔𝗡𝗚 𝗦𝗔𝗪𝗜𝗛𝗢 :
Nimin khan Child Protection Office-ah District Child Protection Unit, Child Welfare Committee leh Child Care Institution-a thawktu hrang hrangte chu an thukhawm.
He hun hi DCPO, R. Lalrinchhani'n kaihruaiin, hnathawh hrang hrang thlirletin infuihtharna hun hman nghal a ni a. Tun hnaia naupangte laka hleilenna thleng : A bik takin hur sualna kawnga naupang khawih chingpen an awm leh thin chu pawi an tiin, an dem thu leh naupang dikna chanvo venhim a nih theih nan nasa zawka hmalak a ngaih thu an sawi a. Nu leh pate leh khawtlang hruaitute pawh naupang venhim kawnga theihtawp chhuaha hmalak a tulziate an sawi bawk.

𝗞𝗛𝗨𝗔𝗜 𝗕𝗔𝗪𝗠 𝗦𝗜𝗔𝗠 𝗭𝗜𝗥𝗧𝗜𝗥 :
Nimin khan Champhai District Jail-ah Champhai District Bee Keeping Assn. leh KVI, Champhai chuan khuai bawm siam dan leh khuai khawi dan Jail tangte hnenah zirtirna an pe. Khuai bawm siam dan hi a taka zirtir an ni a, khuai khawi zirna lehkhabu te sem nghal a ni bawk. Zirtirna hi CDBKA President, C. Roliana leh Secy. C.Lalruatkima te'n an pe a ni.

𝗭𝗨 𝗙𝗨𝗡 𝗠𝗔𝗡 𝗧𝗘𝗨𝗛 :
New Champhai YMA Branch leh Village Council tangkawp chuan tun hnai khan New Champhai Thlanmual-ah Rakzu, fun 100 chuang an man tawh a, an zu mante hi an tichhe nghal vek.
New Champhai YMA Branch chuan an veng huam chhungah ruihhlo eng chi mah zawrh leh lak luh phal a nih loh thu sawiin, New Champhai Thlanmual-ah zu zawrh leh zu in bakah bawlhhlawh paih phal a nih loh thu an sawi bawk

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…