Skip to main content

Ni 3.9.2020 (Ningani)

𝗗𝗢𝗖𝗨𝗠𝗘𝗡𝗧 𝗙𝗘𝗟𝗙𝗔𝗜 𝗟𝗘𝗛 𝗥𝗜𝗡𝗧𝗟𝗔𝗞 𝗡𝗘𝗜 𝗧𝗨𝗥𝗜𝗡 𝗖𝗛𝗔𝗛 :
Nimin chawhma khan Champhai District Level Coordination Committee on Civil Registration System of Births & Deaths chu Bawrhsap Maria CT Zuali, District Registrar of Births & Deaths kaihhruaiin DC Conference Hall-ah hmalak dan tur hrang hrang ngaihtuahin an thukhawm.
Maria CT Zuali chuan pian kum dik tak ziah leh document felfai leh rintlak tak siam a pawimawh thu sawiin, Kristian ram kan nih avangin entawntlak leh rinawm taka kan awm a ngai a ni, a ti a. Duh duhin document a lem an siam lohna turin hemi kawnga thawktu leh mawhphurhna chelhtu hrang hrangte tanrual a ngai hle a ni, a ti a. District Registrar of Births & Deaths chuan Statistical data rintlak leh belhchiandawl tak nei tura tanlak a ngaih thu pawh sawiin, Department hrang hrang leh Economics & Statistrcs Department-te inkarah thawhhona tha tak a awm zel a tul thu sawiin, data hrang hrang danglam nuai ni lo Mizoram pum anga inhman tawm theih tur duan kawngah chak taka hmalak zel a tul thu a sawi bawk.
B. Lalrinhlua, Joint Director, Economics & Statistics chuan Department hrang hrangte nen inrawnin Mizoram Statistical Data duan niin, time series data chhunluh thin chu Mizoramdata.in ah en mai theiha chhawpchhuah a nih thu a sawi bawk.
Meeting chuan veng/khaw tina Registrar of Births & Deaths (RBD) te thla tina lawmman lak thin Rs. 350/- chu Rs. 1,000/- a tihsan a nih theihna tur leh RBD ten Certificate pakhat zel an issue-ah kut hah man Rs. 10/- zel an dawn theihna tura thuneitu sang zawka thlen ni se an ti a. School hrang hrang Admission tihnaah leh Board Examination neih hunahte pian kum, thla leh ni te Birth Certificate a inziak nena inmil thlapa thehluh zel a nih theihna tura khawng taka endikna kalpui thin ni se tih a ni. Meeting-ah hian Birth Certificate pekchhuah kawngah leh endik hna kalpui danah Digitalisation hmang veka hna thawh a nih tawh avangin Certificate lem leh tak hriat hran a awl tawh tih tarlan a ni a. CJM Lalrochami Ralte hnen atangin Birth Certificate lem siam manchhuah case siam sak an awm zeuh zeuh thu leh tunhnai maiah pawh hetiang ti manchhuah chu thiamloh chantira thla ruk chhung Jail tang tur leh Rs.5,000/- chawi tura hremna pek a nih thu a sawi bawk. Meeting-ah hian Birth Certificate-a pa hming a chuan ngei a ngai tih tarlan a ni a. Delayed birth Certificate dilna thlitfim leh Certificate lem dapchhhuah kawnga hmalak a tulziate sawiho a ni bawk.

𝗡𝗔𝗦𝗛𝗔 𝗠𝗨𝗞𝗛 𝗕𝗛𝗔𝗥𝗔𝗧 𝗞𝗔𝗟𝗣𝗨𝗜 𝗗𝗔𝗡 𝗧𝗨𝗥 𝗦𝗔𝗪𝗜𝗛𝗢 :
Ruihhlo leh a kaihhnawih hrang hrang laka India ram a fihlim theihna tura hmalakna, Nasha Mukh Bharat Campaign kalpui dan tur nimin khan Champhai DC Conference Hall-ah Addl. DC Mark Lalthanliana hovin rel a ni.
Nasha Mukh Campaign hi sawrkar laipuia Ministry of Social Justice & Empowerment leh Mizoram Social Defence & Rehabilitation Board te tangkawp hmalakna a ni a. Addl DC chuan ruihhlo do rualin ruihhlo leh kaihhnawih tih vanga natna inkaidarh theihte thleng pawha kan ven tel a ngai tak zet a ni, a ti a. Ualau taka naupangte hmuh theih tura ruihhlo khawih leh tihlan chu ngaihmawh thu sawiin, hemi kawngah tanlak puiah mipui a sawm a.
Ruihhlo ngaite enkawltu Doctor leh mithiamte chu theihtawp chhuaha tan la zel tura fuihin, ruihhlo do kawnga hmalakna chu a vaiin hlawhtling vek thei lo mah se mi pakhat talin damna tluantling a chan theih chuan hlawhtlinna tho a ni, a ti.
Nasha Mukh Bharat Campaign hmang hian kum 2020-2021 chhung hian India rama District 272 ah te ruihhlo do hmalakna kalpui tum niin, Aizawl, Kolasib leh Champhai district-te chu Mizoram atanga he campaign kalpuina tura district thlante a ni a. Narcotics Bureau leh Ministry of Social Justice & Empowerment kaltlanga National Survey neihin drugs hluarna ni a a hriat district zulzuia thlan a ni. He Campaign hi Champhai District-ah September 2020 atanga March 2021 chhunga kalpui tura ruahman chhin niin, Action Plan duan leh senso tur te, hemi hun chhunga hmalak theih dan tur hrang hrangte nimin khan sawiho a ni a. He Campaign kaltlangin damdawi ruih hmang leh zu ngawlveite dapchhuaka an ngawlveina ata chhanchhuak tura beih ni se, an ti.

𝗦𝗘𝗟𝗙 𝗛𝗘𝗟𝗣 𝗚𝗥𝗢𝗨𝗣 𝗧𝗘 𝗧𝗔𝗡 𝗞𝗛𝗔𝗪𝗟 :
Thingtlang hmasawnna atana sawrkar laipui hmalakna peng pakhat National Rural Livelihood Mission hnuaia Mizoram State Rural Livelihood Mission kaltlangin nimin khan Champhai RD Block huam chhunga Self Help Group te tan hmanrua leh khawl chi hrang hrang Custom Hiring Centre khaw 5-a dah turin R.Lalnunkimi, BDO Champhai chuan a sem.
He hun hi Block Mission Manager ZD Lalramdintluangi chuan kaihruaiin an khawl dawnte chu uluk taka enkawl tura chahin a chhiat palh thulhah pawh mi nazawng entir mai lovin a siamna hmun panpui vat turin a chah a. R.Lalnunkimi, BDO chuan an hmanrua leh khawl sem chu member te'n hawh man tlem zawk leh hna sawt zawka an thawh theihna atan tangkai taka hman ni thei se a duh tih a sawi.
Champhai RD Block hnuaia khaw 5 - North Khawbung, Dilkawn, Khuangphah, Tualcheng leh Ngur Village Organisation (SHG khaikhawmtu) te hnenah SHG Member te'n man tlawm zawk leh an
eizawnna mila an hawh theih turin Buhdengkhawl, Mini Power Tiller, Hnim samna khawl 1 theuh pek niin, Tualcheng VO hnenah hnim samna khawl 2 pek an ni.
Champhai RD Block ah hian Village Organisation 17 awm mekin, VO 5-ah
Custom hiring Centre enchhin tawh niin, VO dangah pawh Custom Hiring Centre hi kalpui tura hmalak zui mek a ni bawk.

𝗩𝗔𝗜𝗠𝗜𝗠 𝗦𝗘𝗡𝗚 𝗠𝗘𝗞 :
Khuangthing khawtlang chuan tunlai hian vaimim an chinte an seng mek.
Khuangthing khawtlang hian Covid 19 vanga ei leh bara harsatna a lo thlen thulha rin mai theih turin vaimim chu kumin hian chul ramahte a tam thei ang ber an ching a. Tunlai hian a seng khawm hna an thawk mek a. Heng vaimim chingtute hian an vaimim thar dahkhawmna tur kudam tur silpouline an mamawh hle tih an sawi a. Ruahtui tam lai a nih avangin vaimim an tharchhuahte hi dah hulna tur an neih that loh chuan a chhiat vat a hlauhawm tih an sawi bawk. Sawrkarin vaimim chingtute mamawh hi a ranglamin ngaihtuah sak thuai thei se an duh hle tih sawiin, heng vaimim te hi khuh hul that a nih loha ruahin a nan reng chuan rannungin a ei chhe hma hle niin an sawi bawk.

𝗗𝗨𝗛𝗟𝗜𝗔𝗡 𝗧𝗔𝗪𝗡𝗚 𝗛𝗠𝗔𝗡𝗚 𝗡𝗚𝗘𝗜 :
Mizo Zirlai Pawl, Headquarters Champhai chuan zirlai te chu mahni hnampui ngei nupui/pasal-a nei turin ngenna thuchhuah an siam.
Mizo Zirlai Pawl hmalakna kal zelah kum 2015 atangin kumtin September ni 2 hian Hnamdang Nupui/ Pasal neilo tura inzirtirna ni neih thin a ni a, Covid -19 in harsatna a thlen avangin kumin hian he hun hi hman theih ni lo mah se, Mizo zirlai nupui pasal neih tum te chu mahni hnampui ngei nei turin MZP chuan a ngen a, kawppui atana mahni hnam pui ngei neih hi ram leh hnam humhalhna kawng pawimawh tak a ni tih hria a, mahni infuih thar a, intiam thar leh turin Mizo zirlai zawng zawngte MZP chuan a sawm bawk.
Khawi hmunah pawh awm ila Mizo kan nih anga Mizo hnam aiawhtu kan nih avangin Mizo hnam a mualpho loh a, pawlhdal a nih loh nan zirlaiten theihtawp i chhuah zel ang u, tiin thuchhuahah hian an tarlang a ni.

𝗞𝗛𝗨𝗡𝗚𝗛𝗥𝗔𝗡 𝗭𝗔𝗧 :
Champhai District chhungah sawrkar hriatpui inkhunghranna hmun hrang hrangah mipa 33 leh hmeichhia 3, an vaiin mi 36 khung hran mek an la ni a. Khawzawl District ah pawh khung hran mek hi mipa 9 leh hmeichhia 3, an vaiin mi 12 an la awm mek bawk.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…