Skip to main content

Ni 4.9.2020 (Zirtawpni)

𝗖𝗛𝗔𝗠𝗣𝗛𝗔𝗜 𝗧𝗛𝗔𝗟𝗔𝗜 𝗣𝗔𝗪𝗟 𝗧𝗘𝗡 𝗗𝗜𝗦𝗧𝗥𝗜𝗖𝗧 𝗛𝗢𝗦𝗣𝗜𝗧𝗔𝗟 𝗧𝗟𝗔𝗪𝗛 :
Nimin ni 3.9.2020 (Ningani) khan Champhai Thalai Pawl chuan District Hospital, Champhai a hmalakna chi hrang hrang awm mek te a hmunah kal chilhin Dr Zatluanga, Med. Supt. te nen inkawmna hun an hmang.
Dr Zatluanga chuan kan Minister leh MLA ten theihtawp a hma an lak thu sawiin, Sawrkar hmalakna avanga District Hospital, Champhai pawh changtlung chho zelin tunah hian HDU hmangin damlo an enkawl theih piah lamah tun hnai atangin Kal thalo enkawlnan a pawimawh tak Dialysis pawh an tih tawh thu te. Tunah hian hun rei tak an chawlhsan tawh TRAUMA Center pawh sak chhunzawm leh a nih tawh thu leh hun rei lo teah an zawh thuai a beisei thu a sawi.
Medical Superintendent chuan tunlai khawvelin a buaipui mek Covid-19 hrik enna kawl TrueNAT an buaipui mek thu leh hmanrua tam zawk a rawn thlen tawh thu leh tlem a zawng rawn thleng tur a la awm thu a sawi a. Chubakah hmanrua rawn thleng tawh duhthusam a thalo te thleng lehin buaipui mek a ni a. Heng hmanrua te hi a rawn thlen fel hunah chuan District Hospital, Champhai ah Covid-19 vei leh veilo an enthei tawh dawn a. Tuna TrueNAT khawl an bun mek hian nikhatah mi 35 bawr vel en thei tura beisei ni mahse thawktu lam indaih lohna a nasat em avangin nikhatah hetiang zat hi chu an en theih an beisei loh thu te a sawi bawk. TrueNAT khawl hian Covid-19 hrik enna khawl chauh nilo in natna chi hrang hrang 15 lai hmuhchhuah theihna khawl niin Hospital tan khawl tangkai tak a ni zel dawn a ni. 
District Hospital, Champhai hian tuna an harsatna lian ber pakhat chu thawktu indaih lohna nasa lutuk hi a ni a. An hmanrua neih ang ang te pawh an hman theih loh avangin mipui pawhin Hospital hi an chhawr tur angin an chhawr theilo chu pawi an tih thu an sawi bawk. 
Damdawi In a thawktute hi mi harsa ve te te an nih avangin Hospital in Bus a nei lo avangin harsatna an tawh thin thu leh hmun danga Clinic an neih dawn pawhin kalna tur lirthei ah harsatna an tawh thin thu leh Sawrkarin Staff Bus ngaihtuah thei se chuan tun aia nasa hian mipui tan malsawmna an nih theih a beisei thu a sawi bawk. 
District Hospital a Solar hman theih loha awm reng pawh Sawrkarin Zoram Energy Development Agency (ZEDA) te rawn tirin a siam thatna tur sum pawh an kutah a hlan tawh thu leh an siam that vat a beisei thu a sawi bawk.
Champhai Thalai Pawl te chuan District Hospital, Champhai in harsatna an tawk mekte chu Sawrkarah thlen a, a hlawhtlin theihnan theihtawpa hmalak an tum thu an hrilh bawk.

𝗟𝗜𝗥𝗧𝗛𝗘𝗜 𝗖𝗛𝗨𝗔𝗡 𝗠𝗔𝗡 𝗖𝗛𝗨𝗡𝗚𝗖𝗛𝗔𝗡𝗚 𝗦𝗔𝗪𝗜𝗛𝗢:
State Transport Authority-in Mizoram. khaw hrang hranga lirthei chuan man rualkhai thei ang ber tura kalpui tura ruahmanna a siam bawhzuiin, nimin chawhma khan Champhai Bawrhsap Maria CT Zuali hovin I&PR Conference Hall, CHANEM building-ah Taxi leh Auto Rickshaw fare chungchang sawiho a ni.
Champhai DTO R.Lalnunkimi, chuan
Mizoram chhungah Taxi leh Auto Rickshaw fare in-ang tlanga hman a nih theihna tura State Transport Authority-in rawtna thlen tura a tih bawhzuia thukhawm an nih thu a sawi a. Meeting chuan Champhai District chhunga Taxi chuan man atan, an tlanchhuah atanga KM 1-ah Rs. 50, hemi hnu hian KM 1 zelah Rs. 40 leh zan lamah chuan chhun rate bakah za zela 50 (50%) a sang ni turin STA-ah rawtna thlen ni se. Auto Rickshaw chuan man atan, an tlanchhuah atanga KM 1-ah Rs. 30, hemi hnu hian KM 1 zelah Rs. 20 leh zan lamah chuan chhun rate bakah za zela 50 (50%) a sang ni turin STA-ah rawtna thlen ni se tih a ni bawk a. Heng bakah Fare dang chu DTO kaihhruaiin, Police, Consumer hruaitute leh Taxi leh Auto Rickshaw neitute'n bithliah siam fel tura sawiho ni se tih a ni a. Meeting chuan Champhai khawpui chhung lirthei tawt lutuk tur a ziaawm theihna turin Taxi, Auto Rickshaw leh Sumo Stand-te September ni 7, 2020 ah enho ni se an ti bawk.
Champhai Bawrhsap Maria CT Zuali chuan Taxi leh Auto Rickshaw khalhtute chu Khualzin te'n Sawrkar thuneitute aia an hmuh tam leh an hnek hnaih zawk an nih avangin Champhai hmel lanna tak tak an ni tih inhria a, rate chungchangah pawh mikhual an nih vanga lo bum mai ching awm thei a nih avangin rinawmna kawngah inzirtir uar thar turin a chah bawk.
Lirthei khalh chu an eizawnna ni mah se mipui rawngbawltu an ni tih in hre reng tur leh mirethei atanga mi hausa ber thleng pawhin phur mah se hawihhawm taka lo chhawn zel tura chahin an lirtheia chuang te chu an tan mi pawimawh ber an ni tih hre reng turin a chah a. Champhai chu Mizorama Lirthei tamna ber pawl ni mah se Document fel lo a tam hle tih sawiin lirthei kan nei a nih chuan sawrkarin a phut angin khua leh tui tha chuan dan angin engkim tih a ngai tih a sawi bawk.
Maria CT Zuali chuan Champhai khawpui a lo nawm zawk theihna tura mawhphurtu pawimawh ber chu Champhai mipui an ni tih sawiin, khawpui nuam ni tur chuan khawpui lailia inhnawhkhawm vak ringawt lo va engkim a in remfel vek a ngai tih a sawi a. Nahaia chu ni se, tia midangte tih tura dah ringawt lova zawi zawia
insiam rem zel a tul tih a sawi bawk.
He meeting-ah hian mahni chauh indah pawimawh bik lo va, mipui leh lirtheia eizawngtute that tlan dan ber ngaihtuah a tul thu tarlan niin Pawl leh Sawrkar thuneitute lam thu inhmu lo palh a thlen changin thuneitu sang zawka intlan khalh a, inchungtlakna thleng lo va, District chhunga chinfel theih chin chu chinfel hram hram tum a pawimawh tih tarlan tel a ni bawk.

𝗞𝗘𝗣𝗛𝗔𝗛 𝗛𝗟𝗔𝗜 𝗠𝗔𝗡 :
India rama tribal te'n an kara sumdawng tlazep awm lova ramngaw hausakna atanga hlawkna an hmuh theihna tur, Sawrkar laipui Ministry of Tribal Affairs kaltlanga tribal-te dinhmun tihhmasawn leh hamthatna tura duan ‘Pradhan Mantri Van Dhan Mission’ kalpui dan tur chungchang relin District Level Coordination & Monitoring Committee chu nimin khan Mark Lalthanliana, Addl DC Champhai hovin DC Conference Hall-ah an thukhawm.
Addl. DC Mark Lalthanliana chuan mipui tana hmasawnna leh hamthatna tura tanpuina sumfai leh hmanraw hrang hrang tangkai zawk leh awmze nei thei ang bera hman a nih theihna turin department hrang hrangte inzaitawn a, mipui rawngbawl nih inhriaa ngaihtuahna nasa zawka sen a tul thu a sawi a.
Self Help Group member zinga vengva leh theihna nasa tak neite chu a bika training pek a, a hralhchhuahna dap thlenga puih an tul a ni, a ti a. Champhai District-ah Van Dhan Mission hlawhtling taka kalpui a nih theihna tura theihtawp chhuah puiah member-te a sawm bawk.
Champhai district-ah Van Dhan Mission kaltlanga hamthatna dawng tura thlan Champhai Town Multipurpose Cooperative Society (CTM-PACS) leh Hnahlan Grape Farming & Processing Cooperative Society Ltd. atangin Van Dhan Mission kaltlanga hmalak dan turte ngaihthlak a ni a. Champhai District tana Stage I kaltlanga sum dawn tur Rs. Nuai 30 hman dan turte sawiho niin, fund lokal hunah a hman dan tur rel leh ni se, an ti.
Van Dhan Mission hi Mizoramah chuan Cooperation Department kaltlanga kalpui mek a ni a. A bul tan nan Mizoramah Van Dhan Vikas Kendra 44 hnuaiah Van Dhan Self Help Group 663 siam a ni a. Hemi hnuaiah hian tribal hamthatna dawng thei tur mi 11,631 an awm dawn a ni.

𝗩𝗔𝗪𝗞 𝗛𝗥𝗜𝗣𝗨𝗜 𝗖𝗛𝗨𝗡𝗚𝗖𝗛𝗔𝗡𝗚𝗔𝗛 𝗦𝗔𝗪𝗜𝗛𝗢 :
Nimin chawhnu khan Champhai District Bawrhsap Maria CT Zuali hovin District Level Committee on African Swine Fever & other Transboundary Animal Diseases (TADs) chu DC Conf. Hall-ah thukhawm in, African Swine Fever leh ran natna dang ramri kaltlanga inkaidarh theih hrang hrangte ven dan tur an relho a ni.
Bawrhsap chuan African Swine Fever laka Champhai District him theihna tura theihtawp chhuaha tanlak mek zel anih thu sawiin, ram dang leh State dang atanga Vawk, Vawksa leh Vawksa atanga siam reng rengte Champhai District-a lakluh khapna thupek chhuah bakah Champhai District chhung khawi khuaah mah Vawk, vawksa leh vawksa atanga siam reng rengte lakluh leh phurhchhuah khap tlat a ni, a ti a. Ramri vengtu Assam Rifles hotute chu uluk lehzuala ramri veng tur leh dan lo a thil tih leh ran lakluhte venhim
kawngah theihtawp chhuah turin a hrilh a. Ramri hrul khuate hnenah Vawk natna African Swine Fever hlauhawm zia a zau thei ang bera hrilhfiah a tul thu a sawi bawk. Dan leh thupek kengkawhtute chu danin a phal loh leh khap mekte ven leh man kawngah rang taka hma la thin turin a chah a. Thawhhona tha tak hnuaiah infuihthara kan tanho zel chuan ASF hri leng thei tur lakah kan him thei ngei dawn a ni, a ti bawk.
Dr.B.Zonghinga, DVO & Member Secretary chuan Covid-19 vanga ramri ven anih avangin kan la him hram a, ramri veng an tin tak hnuin ramri kaltlanga Vawk lakluh atanga lo lut thei reng anih thu a sawi a. Undivided Champhai District-ah Vawk 12,300 leh Champhai District bikah Vawk 8,000 awm meka chhinchhiah a nih thu a sawi bawk.
Meeting-ah hian AH&Vety hotute chuan August ni 19, 2020 ah ramri kaltlanga Vawk lakluh 7 an man thusawiin, heng zinga 4 te chuan ran natna Porcine Reproductive & Respiratory Syndrome (PRRS) an vei tih hmuh chhuah a nih thu leh, Court Case kal lai mek a nih thu an sawi a. Mihring in ASF a vei thei lo va; mahse, thawmhnaw, pheikhawk leh
hmanraw hmangtein a pu darh thei a ni. A venna Vaccine leh enkawlna bik damdawi a awm lo tih tarlangin, Vawk damlo a awm chuan AH &Vety Department thawktute hriattir zel turin mipui an ngen bawk.
Nimin meeting-ah hian District Level Committee on African Swine Fever & other transboundary Animal Diseases (TADs) Member-te an tel tha hle a ni.

𝗥𝗔𝗟𝗡𝗔 𝗦𝗨𝗠 𝗣𝗘𝗖𝗛𝗛𝗨𝗔𝗞 :
Chief Minister remtihna in nimin khan C. Laltanpuia (fam) s/o C. Sualneka, President, Champhai Vengthlang Branch YMA chu Chief Minister's Relief Fund for Covid-19 atangin a ralna tur Rs. Nuai khat sanction a ni. Ani hi COVID-19 hrileng vanga Indo-Myanmar ramri-ah tlawmngaia a duty laiin Scrub Typhus veiin, a natna hi a thihpui ta a ni. Ralna sum hi Champhai DC hnenah pek niin, ani in a remchan dan angin C. Laltanpuia (fam) chhungte hnenah a hlan dawn a ni.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Nilaini khan Champhai Police Flying Squad-te chuan inkharkhipna dan bawhchia mi 4 manin, vantlang hmuna hmai tuam lo vek niin, Rs. 100 theuh chawitir an ni. Nilaini khan Mizoram pumah inkharkhipna dan bawhchhia hi mi 168 man niin, an pawisa chawi tlingkhawm hi a vaiin Rs. 23,900 a ni.
Nilaini thleng khan Mizoram puma
inkharkhipna dan bawhchhia te pawisa chawi tlingkhawm hi a vaiin Rs. 68,83,200 a tling tawh bawk.

𝗞𝗛𝗨𝗡𝗚𝗛𝗥𝗔𝗡 𝗭𝗔𝗧 :
Sawrkar hriatpui Chaphai District-a inkhunghranna hmun hrang hrangah mipa 28 leh hmeichhia 3, an vaiin mi 31 khung ran mek an la ni a. Khawzawl district-ah mipa 8 leh hmeichhia 3, an vaiin mi 11 khung hran mek an la ni bawk.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…