Skip to main content

Ni 5.9.2020 (Inrinni)

𝗕𝗔𝗪𝗥𝗛𝗦𝗔𝗣 𝗟𝗘𝗛 𝗕𝗔𝗡𝗞 𝗛𝗢𝗧𝗨𝗧𝗘 :
Nimin khan Champhai District chhunga Bank hrang hrang hotute chuan, Bawrhsap Maria CT Zuali hovin March 2020 thlenga Bank hrang hrang leh stakeholder-te hmalakna hrang hrangte an thlirho.
Maria CT Zuali chuan Covid-19 hripui leng vanga ram sum leh pai dinhmun leh che vel a tlak hniam phah thu a sawi a. Mitin banphaka Banking facilities chhawp tuma sawrkar hmalaknate tarlangin, thingtlang mite tihhmasawn kawnga sawrkar hmalaknate thlawp a Bank hman dan leh tangkainate chiang zawka an hriat theihna kawnga tan la turin a chah a.
Banker kalkhawmte chu mirethei leh chanhai zawkte tana penchhuak tur leh Entrepreneurs leh Self Help Group-te chawikan kawnga inhawng lehzual tura hrilhin, mipui hnimhnaia anmahni puitu thian tha tak nih tum turin a chah a. Loan puktute pawh loan rulh ngaipawimawh tura chahin, loan rul tha lote umzui kawngah Banker-te chu DC Office-in a tawiawm tlat dawn tih a sawi bawk.
Kumin March 2020 thleng Champhai District-a Bank hrang hrangte Credit
Deposit (CD) ratio chawhrual chu 45.47 % niin, December 2019 Quarter tawp aiin 2.20% in sang mah se CD Ratio bituk zat 60% chu a phak lo a ni. KCC/ Crop Loan Rs. Nuai 672.31 pekchhuah niin, crop loan advances chu 3.60% niin, Crop Loan to Agriculture chu 23.41 % a ni a. Social Security Scheme hnuaiah bank kaltlanga Cashless transaction pek niin, Pradhan Mantri Jan Dhan Yojana (PMJDY) hnuaiah mi 906, Pradhan Mantri Suraksha Bima Yojana (PMSBY) hnuaiah mi 1032, Pradhan Mantri Jeevan Jyoti Bima Yojana (PMJJBY) hnuaiah mi 641 leh Atal Pension Yojana (APY) hnuaiah mi 48 ziah luh thar an ni a. 2019-2020 Financial Year chhunga Annual Credit Plan (ACP) hnuaia hnathawh te thlirho in, Annual Credit Plan for Financial Year 2020-2021 chu pharh nghal in, a thuphunga pawm a ni a.
Sawrkar budget atanga hamthatna lokala innghat mai lova Bank Credit atanga hmasawnna kalpui a nih theihna tura tun aia tan lehzual a tul thu pawh tarlan a ni a. Gram Sabha kaltlanga Financial Literacy Campaign neih rawt niin, Pamphlet semchhuah ni se ti a rel a ni a.
Social Security Scheme kaltlanga hamthatna mipuite’n an chhawr tangkai theihna turin zau zawka inhrilhfiah ni se, an ti a. Heng bakah hian Bank Security chungchang leh inkaihhruaina tha zawk awm theih dan turte sawiho niin, Bank tinte pawh chak zawka hma la a, quarter tawp ni atanga chhiara ni 15 chhunga
data thehlut thin tura hriattir an ni a. Potential Credit Linked Plan (PLP) duanna tura tul leh mamawhte sawiho a ni bawk.
Champhai District-ah hian Bank branch hrang hrang 14 awm mekin, Public Sector Bank 4, Private Sector Bank 4, Regional Rural Bank 5 leh State Cooperative Bank 1 te a awm mek a. ATM 9, Business Correspondent 8, CSP 1 leh IPPB hnuaia Banking Touch Point 26 te an awm mek a ni.

𝗩𝗘𝗡𝗚𝗧𝗛𝗟𝗔𝗡𝗚 𝗞𝗢𝗛𝗛𝗥𝗔𝗡 𝗧𝗨𝗜𝗣𝗨𝗜𝗥𝗔𝗟 𝗧𝗟𝗔𝗡𝗚𝗗𝗨𝗡𝗚𝗔𝗛 :
Champhai Vengthlang Presbyterian Kohhran chuan Tuipuiral Tlangdunga Kohhran hrang hrang lirnghing tuarte tlawhchhuakin tanpuina Rs. 1,80,000 an semchhuak.
Ningani khan Champhai Vengthlang Presbyterian Kohhran chuan Bialtu Pastor Rev. R. Vanlalruata, Pro Pastor Joel Lianrinzuala leh Rev. John B. Hmar, Counsellor, FG&CC ten hovin Tuipuiral tlangdunga Presbyterian Kohhran hrang hrang lirnghing tuarte tlawhin an fehchhuak a. Lirnghing tuar kohhran te hnenah chhawmdawlna leh tanpuina pawisa an hlan a, Tuipuiral tlang dunga Kohhran hrang hrangte chuan tanpuina petu Champhai Vengthlang Kohhran chungah lawmthu an sawi a ni.
Champhai Vengthlang Kohhran hian Vaphai Vengthar Kohhran ah Cheng Sing 5 an hlan a, Khuangleng South Kohhran, Sesih Kohhran leh Samthang Kohhranah te Cheng Sing 3 hlan a ni a. Dungtlang Kohhran ah Cheng Sing 2 hlan niin, Farkawn Pastor Bialah leh Khawbung Pastor Bialah te Cheng Sing 1 ve ve hlan a ni. Tuipuirala kohhran hrang hrang lirnghing tuarte tlawhchhuak hian Bialtu Pastor leh Kohhran hruaitu mi pasarih te an fehchhuak a ni.

𝗡𝗔𝗕𝗔𝗥𝗗 𝗜𝗡 𝗭𝗜𝗥𝗧𝗜𝗥𝗡𝗔 𝗣𝗘 :
Nimin chawhnu khan NABARD Mizoram Regional Office buatsaihin Champhai DC Conference Hall-ah Banker leh Stakeholder-te pualin Self Help Group Bank Linkage Programme chungchang inzirtirna neih a ni a, Champhai Bawrhsap Maria CT Zuali chuan a hmanpui.
Khuallian Maria CT Zuali chuan Banker leh Stakeholder-te nena an hnathawh leh hmalaknate inhriatpuitawnna hun duhawm tak hman a ni chu lawmawm a tih thu sawiin, sawrkar hmalakna leh duhdante thlawpa mi rethei leh thingtlang lam mite chawikan leh puih kawnga penchhuah a hun tak zet a ni, a ti a. Loan mamawhte hnenah loan-te pe a, eizawnna ngelnghet leh inchawikanna tura puih inhuam turin Banker-te chu a chah a. Training hlawk thlak leh rahchhuah tha tak an neih theihna turin duhsakna a hlan nghal bawk.
Resource Person Rabishankar Likmabam, District Development Manager, NABARD Champhai chuan SHG BLP, DAY-NULM, DAY-NRLM, Bhoomi Heen Kisan (JLG), KCC for Animal Husbandry & Fisheries, FPO leh AIF chungchang zirtirna a pe a. Self Help Group Bank Linkage Programme chungchang zawhna leh chhanna hun buatsaih a ni bawk.

𝗖𝗛𝗔𝗠𝗣𝗛𝗔𝗜 𝗗𝗜𝗡𝗛𝗠𝗨𝗡 :
Champhaia Rapid Antigen Test hman a nih atangin Sampe 353 endik tawh a ni a, ZMC leh Silchara thawn tawh te nen a vaiin Champhai District chhungah Sample 2164 endik tawh a ni a.
Champhai District chhungah Covid-19 kai hmuhchhuah 16 zinga 15 te chu enkawl dam tawh an ni a. Tun hnaia State pawn atanga rawn haw mi 8 te sample la laksak loh niin, Champhai an rawn thlen atanga ni 5 hnuah sample hi lak a ni ang.
Hetihlai hian Champhai District chhunga Sawrkar hriatpui Quarantine Centre-ah tun hnaia state pawn atanga rawn haw mi 31 khung hran mek an ni a. DPRC Quarantine Centre Keifangtlangah mi 16, mipa 13 leh hmeichhia 3 te khunghran mek an ni a Tourist Lodge Quarantine Centre-ah mipa 7 bakah In lama inkhung hrang mipa 7 an awm bawk.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 𝗠𝗔𝗡 :
Ningani khan Champhai District chhungah inkharkhipna dan bawhchhia mi 10, vantlang hmuna hmai tuam lo 9 leh curfew laia lirthei tlan chhuak pakhat man an ni a. An pawisa chawi tlingkhawm hi Rs. 1900 a ni. Mizoram pumah Ningani khan inkharkhipna dan bawhchhia mi 178 man niin, an pawisa chawi hi a vaiin Rs. 22,200 a ni a; Ningani thlenga Mizoram puma
inkharkhipna dan bawhchhia mi 38,128 te pawisa chawi hi a vaiin Rs. 69,05,400 a tling tawh bawk.

𝗩𝗖 𝗖𝗛𝗔𝗥𝗚𝗘 𝗜𝗡𝗛𝗟𝗔𝗡 :
Champhai Zotlang VC hluite leh VC thlan tlin tharte chuan nimin khan charge an inhlan fel.
VC Charge inhlanna hi Rochhunga Ralte, RO kaihhruaiin VC house-ah neih a ni a. Champhai Zotlang VC hluite hian VC tharte hnenah hian chhiat tawh thulha khawtlang mipui tana hman theih tura an ruahman, Ambulance thla hmasa thla tira an lei, nimina Champhai rawn thleng leh LPK Tipper an neih sa bakah, pawisa, a sum faiin Cheng 27,050 leh Cheng 1,00,927 pass book-in an hlan tel nghal a. R. Lalhmunsiama, VCP kalchhuak ta chuan heng hma an lo lak tawhna leh pawisa an la neihte hi H. Lalbiakchhunga, VCP thar hnenah hian a hlan a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…