Skip to main content

Ni 1.10.2020 (Ningani)

𝗭𝗢𝗞𝗛𝗔𝗪𝗧𝗛𝗔𝗥 𝗞𝗔𝗟𝗧𝗟𝗔𝗡𝗚𝗔 𝗕𝗨𝗡𝗚𝗥𝗨𝗔 𝗟𝗔𝗞𝗟𝗨𝗛𝗡𝗔 𝗞𝗔𝗪𝗡𝗚 𝗛𝗔𝗪𝗡𝗚 𝗗𝗔𝗪𝗡 𝗧𝗔 :
Mizoram State Disaster Management Authority chuan vawiin atanga hman tan turin Inkharkhipna kalpui mek chu tun thla chhung atan a thlahdul belh leh a. Mizoram luhchhuahna Bairabi, Kanhmun, Khawkawn, Vairengte leh Zokhawthar kaltlang kawngpuite chu bungrua leh khualzin phur lirthei tan hawn a ni ang.
Lalnunmawia Chuaungo, Chairman, State Executive Committee, Mizoram State Disaster Management Authority leh Mizoram Chief Secretary ni bawk chuan Section 22(2)(h) &24(l) of the Disaster Management Act, 2005 in thuhneihna a pek angin 1.10.2020 leh 31.10.2020 inkara Mizoram chhunga inkaihhruaina kalpui dan tur nimin khan thupek a tichhuak a. Mizoram luhchhuahna Bairabi, Kanhmun, Khawkawn, Vairengte leh Zokhawthar kaltlang kawngpuite chu bungrua leh khualzin phur lirthei tan hawn a ni ang a.
Lengpui airport chu hawn chhunzawm a ni ang. Commercial passenger flight-te thlawh dan tur chu General Administration Department (Civil Aviation Wing), Government of Mizoram leh Airlines-te inrawnin an ruahman thin ang.
Mizoram-a lo lut reng reng chu entry point-ah uluk taka screening kalpui chhunzawm zel a ni ang a, khunghranna tur hmun ruatah khung hran tur an ni a. District Headquarters-ah te chuan zan dar 8:00 leh zing dar 4:30 inkarah pawn chhuah khap tlat a ni. Sakhaw biakna hmunahte chuan mipui punkhawmna huaihawt phal a ni lo. Zing tawngtai inkhawm leh committee/rorel inkhawm erawh chu mi 50 (sawmnga) aia tam lo tan neih phal a ni a. Heng inkhawmnaah hian zaiho khap a ni. Mitthi vuina, lungphun, inneihna (man hlan, inneih inkhawm leh reception), Anniversary, pawl thila kalkhawmna, book release, etc. ah te chuan mi 50 (sawmnga) aia tam punkhawm khap a ni a. Heng hmuna telte chhinchhiahna kimchang (hming, address, phone number leh kal hunte) ziahna bu/register chu a huaihawttu ten an vawng tur a ni. Chhiatni/thatni puipunna hmunahte zai/zaikhawm loh tur a ni a. Mitthi vuina-ah thingpui sem loh tur a ni.
School, college, educational leh coaching institution-ah online distance learning kalpui chhunzawm theih a ni. Containment area pawnah chuan pawl 9 atanga pawl 12 zirlaite chuan mahni duhthlanna-in an zirtirtute rawn turin sikul an kal thei ang.
Mipui ten a hmuna an en theih tur games & sports tournament huaihawt phal a ni lo a. Entu mipui punkhawmna tel lo games & sports practice erawh chu neih phal a ni.
Amaherawhchu, mi 25 aia tam punkhawm khap a ni. He thupek kimchang hi phek hnung lamah tarlan a ni.

𝗛𝗠𝗘𝗜𝗖𝗛𝗛𝗘 𝗕𝗔𝗜𝗛𝗩𝗔𝗜𝗧𝗘 𝗧𝗟𝗨𝗞𝗟𝗨𝗛 𝗟𝗔𝗜𝗟𝗔𝗪𝗞𝗡𝗔 𝗜𝗡 𝗛𝗔𝗪𝗡𝗚 :
Sawrkar laipui Ministry of Child Development leh Mizoram sawrkar, Social Welfare Department kaltlanga sak hmeichhe baihvaite tlukluh lailawkna hmun ‘One Stop Centre’ Building thar Champhai Vengsang a mi chu nimin chawhma khan Vice Chairman, Health & Family Welfare Board, MLA Dr. ZR Thiamsanga'n a hawng.
Khuallian Dr. ZR Thiamsanga chuan One Stop Centre awmzia leh hnathawh phung chuan a rilru a hneh thu sawiin, hmeichhe chanhai leh riangvaite tlukluhna hmun One Stop Centre chu rawngbawlna pawimawh tak, taksa hrisel, rilru leh thlarau nun thlenga kaihhruaina hmun a nih thu a sawi a. Ramri depa awm One Stop Centre mamawhna chu a san zel a rin thu sawiin, an mamawhna-ah a phak ang tawka tanpui a inhuam thu a sawi.
One Stop Centre (OSC) hawn thar tak hian an hnena tlulutte thlenna tur Room 3, khum 5 awmna a nei a. Eirawngbawlna hmun, Counselling Room, Video Conferencing Room, Staff room leh inthiarna tha tak a kentel mai bakah CCTV Camera vuah a ni bawk.
August Ni 7, 2019 atang khan One Stop Centre Champhai hmingin hna thawh tan a ni a, nimin thlengin anmahni beltu hmeichhe 23 te an enkawl tawh a ni.

𝗧𝗥𝗨𝗘𝗡𝗔𝗧 𝗞𝗛𝗔𝗪𝗟 𝗛𝗔𝗪𝗡𝗚 :
H&FW Board vice chairman Dr. ZR Thiamsanga, Chairman, Covid 19 Medical Operational Team Vice Chairman chuan nitin eizawnna leh khawsak phungte tibahlah lova Covid-19 nena chenho thiam a ngaih thu sawiin, Sawrkarin inkaihhruaina a siamte erawh tha taka zawm a ngai a ni, a ti.
Nimin khan Dr. Z.R. Thiamsanga MLA hian Champhai District Hospital-a TrueNat Laboratory bun thar chu khuallian niin a hawng a. He hunah hian Champhai Bawrhsap Maria CT Zuali chu khualzahawm a ni.
Khuallian Dr. Z.R. Thiamsanga chuan
District Hospital Champhaia TrueNat khawl hawn a ni thei chu lawmawm a tih thu sawiin, hlawhtling taka bunfel a nih theihna kawnga tha thawhtu zawng zawngte fakawm a tih thu a sawi a. Sawrkarin Covid-19 inkaihhruaina a thlah dul mek zel karah hri laka kan State himna turin puipun khap chhunzawm zel a nih thu sawiin, Covid-19 hri vanga thi an la awm lo chu Pathian venna leh kan zavaia tanhona vang liau liau a ni, a ti a. Ram hruaituten tumah thliar bik awm lovin tan an la a, ral hmatawnga ding frontline worker, Sawrkar hnathawk, NGO, Media te nen tang ho tlangin tun hun hi kan thlen theih phah a ni, a ti bawk. TrueNat khawl hawnna hun hi Dr. Zatluanga, DMS Champhai chuan a kaihruai a. Dr. R. Vanlalchhuangi, MO, incharge TrueNat Laboratory chuan report a pe a. August ni 24, 2020 ah TrueNat khawl bunfel niin, September ni 14,2020 atangin Covid-19 sample te endik tan niin, sample 6 endik a ni a. Nimin thlenga sample endik 88 atangin hri kai 3 hmuhchhuah a ni tawh tih a tarlang.

𝗡𝗢𝗩𝗘𝗠𝗕𝗘𝗥 𝗧𝗛𝗟𝗔𝗔𝗛 𝗘/𝗥𝗢𝗟𝗟 𝗘𝗡𝗡𝗔𝗪𝗡 𝗗𝗔𝗪𝗡 :
Nimin chawhnu lam khan Champhai District Level Standing Committee chu District Election Officer Maria CT Zuali hovin DC Conference Hall-ah an thukhawm.
He hunah hian January Ni 1, 2021 qualifying date a hmanga Special Summary Revision of Electoral Roll, 2021 kalpui dan turte, Polling Station thlak ngai Rationalisation of Polling Station chungchangte ngaihtuahho a ni. Polling Station thlak ngai zingah 25/12- Leithum Polling Station atana hman mek Govt. Primary School aiah Govt. Middle School, 25/29-Dungtlang Polling Station atana hman mek Govt. Primary School aiah Govt. Lianchhiari Middle School, 25/24- Khuangthing Polling Station hman mek Govt Primary School aiah Govt. Middle School leh 25/25- Thekpui Polling Station atana hman mek Govt. Primary School aiah Govt. Middle School te chu tha tih niin, rawtnate Election Commission of India (ECI) pawmpui tura thawn a ni ang. Lalnunfela Chawngthu, Election Officer chuan Special Summary Revision of Electoral Roll, 2021 kalpui dan tur chungchang a sawifiah a. Ruahman dan chuan November Ni 16, 2020 khian Draft Electoral Roll tlangzarh a ni ang a. 16.11.2020 atanga 15.12.2020 chhungin dilna leh rawtna thlen hun Claims and Objections atan hawn a ni ang a, hemi hun chhung hian remchan dan ang a Special Campaign neih a ni ang. 10.1.2021 atangin dilna leh rawtna thlente chinfel a ni ang a, 14.1.2021 atangin database siamthat leh supplement chhutchhuah tan a ni ang a, 20.1.2021 ah Electoral Roll thar ber tlangzarh tum a ni.

𝗦𝗔𝗪𝗥𝗞𝗔𝗥𝗜𝗡 𝗖𝗛𝗔𝗪𝗟𝗛𝗧𝗜𝗥 𝗥𝗜𝗛 :
Nimin khan School Education Department Commissioner leh Secretary chuan thupek chhuahin, naupang kum tlinglo laka mawi lo taka chea puhna thubuai nei mek C. Lallianpuia chu thupek dang a awm leh hma chuan a hna atanga suspend a ni tih a tarlang.

𝗗𝗜𝗦𝗧𝗥𝗜𝗖𝗧 𝗝𝗔𝗜𝗟 𝗧𝗟𝗔𝗪𝗛 :
Champhai Add. Session Judge hlui, Member Secretary, State Level Services Authority nihna chelh mek chuan nimin khan District Jail Champhai a rawn tlawh.
Thubuai nei ten sum harsatna avanga Ukil an ruai thei lo a nih chuan Sorkarin Ukil a rawihsak thinna ang sum kha tun hnaiah ta tawp rih a. Hetiang atana hman tur fund hi Central lam atanga hmuh a nih tak miau loh vang a ni tih te Jail tangte hnenah hian a hrilh a. Sorkar lamah theihtawpa nawr mek a nih thu leh hetiang fund hi an dawn leh ve leh a hma a mi angin thil a kal leh mai tur thu te a sawi a. Sum harsatna avangin Lok Adalat pawh an chawl lailawk mek tih sawiin, an chungthu rel fel tawh (convict) tawh hoin appeal chungchangah harsatna an neih leh neih loh te a enfiah nghal bawk.

𝗩𝗜𝗥𝗠𝗘𝗣 𝗛𝗠𝗔𝗡𝗚𝗔 𝗭𝗜𝗡 𝗠𝗔𝗡 :
Vawiin atangin Helicopter chuan man chu tihsan a ni dawn a, Aizawl leh Champhai inar mipakhat chuan man chu Rs. 3000 a ni tawh ang a, naupang kum 4 hnuai lam chuan man chu pakhat tan Rs. 600 a ni tawh bawk ang. Aizawl leh Khawzawl inkar chuan man chu puitling tan Rs. 2800 leh naupang kum 4 hnuai lam tan Rs. 560 a ni ang a. Chartering/hiring man pawh darkar khatah Rs. 80,000 ni thin chu Rs. 95,000 a tihsan a ni dawn ta bawk.

𝗛𝗥𝗜 𝗞𝗔𝗜 𝗣𝗔𝗞𝗛𝗔𝗧 𝗘𝗡𝗞𝗔𝗪𝗟 𝗗𝗔𝗠 :
Nimin chawhnu khan Champhai District Covid Care Centre a enkawl mipa pakhat, kum 35 mi chu dam takin CCC atang hian chhuahtir a ni a, in lamah ni 14 chhung a inkhung chhunzawm dawn a ni. Mizoram-a Coronavirus 28 hmuh chhuah thar zingah Champhai District-ah hri kai 1, Assam atanga lo kal, khung hran lai a tel a. Heti hian Champhai District-ah hri kai zawng zawng mi 19 awm tawhin, mi 17-te chu enkawl dam an ni tawh a, mi 2 enkawl lai an awm mek an ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…