Skip to main content

Ni 12.10.2020 (Thawhtanni)

𝗠𝗜𝗣𝗨𝗜 𝗛𝗜𝗠𝗡𝗔 𝗧𝗨𝗥𝗜𝗡 𝗞𝗔𝗪𝗡𝗚𝗣𝗨𝗜 𝗘𝗡𝗗𝗜𝗞 𝗛𝗡𝗔 𝗧𝗛𝗔𝗪𝗞 𝗧𝗔𝗡 :
Champhai District chhunga lir thei che vel leh mihring an himna tura Champhai District Bawrhsap-in Thla liam ta September ni 21-a thupek a lo chhuah tawh bawhzuina hmasa atan Zirtawpni chawhnu khan Road Protection Squad Committee, Champhai chu an Chairman, Lalnunfela Chawngthu, Sub-Divisional Magistrate hovin Champhai khawpui chhung an fangin an thawk chhuak a; kawngpui nek chep zawnga hma laknate leh khawlaia inzuarte an endik.
Road Protection Squad Committee Champhai hian Champhai khawpui luhka leh hmel lanna pawimawh tak Kanan Veng kawngpui kam hrutin, kawngpui nek chep leh kawngpui tihnawktu hrang hrangte an endik a. Ngaih pawimawh lai awmte senghawi a, thianfai turin hriattirna an pe nghal zel a. He mi hnu hian khawlaia inzuar, Tuipui Bazar leh Dawr Veng-a mi dawr bungrua, kawng dala dahte enfiah lehin, dan pal zut mante chu insenghawi tirin, ti tawh lo turin an hriattir nghal zel a ni.
Road Protection Squad Committee Champhai chuan vantlang tana hnawk leh kawngpui dal zawnga hmalakna leh mipui tana hnawksak, mipui himna atana hluahawma bungrua leh hmanraw dahhnawkte hnenah a rang lama seng hawi tura hriattirna pein, a tul angin hma a la zel dawn a. A remchan dan ang zelin
Champhai khawpui chhung veng hrang hrangte fangin, an endik zel dawn a ni.

𝗣𝗥𝗘𝗦𝗕𝗬𝗧𝗘𝗥𝗬 𝗜𝗡𝗞𝗛𝗔𝗪𝗠𝗣𝗨𝗜 𝗧𝗜𝗔𝗞 𝗧𝗔 :
Champhai North Presbytery Inkhawmpui, Kahrawt Kohhran Biak Ina neih chu Inrinni khan Palai Rorel, Kohhran Upa nemngheh leh Upa thite sunna hun hman zawh a nih hnu-ah, kharna neih zui niin, an tiak.
Champhai North Presbytery chuan nakkum 2021, Presbytery neih lehna hmun atan Vengthlang North, Prebyterian Biak In an ruat a, a hun atan Oct. 7-10 an ruat bawk a. Inrinni chawhma khan Palai Rorel neiin, chawhnuah Kohhran Upa nemngheh
Inkhawm leh Kohhran Upa thite sunna hun hi an hmang a. Kohhran Upa nemngheh hi 9 an awm a, Kohhran Upa thi hi 6 an sun bawk a ni. Inkhawmpui rorel-ah hian Kohhran 4-te Upa thlan an dil phalsak an ni a. Hnahlan Kohhran leh Hmunhmeltha Hunthar Kohhrante Biak In sak that phalsak an ni bawk. Champhai North Presbytery huam chhungah hian Pastor bial 5 : Vengthlang Pastor Bial, Kahrawt Pastor Bial, Bethel Pastor Bial, Zote Pastor Bial leh Hnahlan Pastor Bial-te an awm a ni.
Champhai South Presbytery, Kanan Veng Kohhran Biak Ina neihah Inrinni khan Palai Rorel inkhawma hun hman a ni a. Nakkum Prebytery, Inkhawmpui neih lehna hmun atan Champhai, Zotlang Presbyterian Biak In ruat a ni a. Champhai South Presbytery-ah hian Pastor bial 5 : Vengsang Pastor Bial, Kanan Pastor Bial, Ruantlang Pastor Bial, Kelkang Pastor Bial leh Zokhawthar Pastor Bial-te an awm a ni. Nimin khan, Upa nemngheh leh Upa thite sunna neih a nih bakah, Upa Ordination kum 50 tling chawimawina neih a ni bawk.

𝗕𝗔𝗪𝗥𝗛𝗦𝗔𝗣 𝗜𝗡 𝗞𝗛𝗔𝗣𝗡𝗔 𝗧𝗛𝗨𝗣𝗘𝗞 𝗖𝗛𝗛𝗨𝗔𝗛 :
Ningani khan District Magistrate Champhai, Maria CT Zuali chuan kawng siam chungchangah thupek a chhuah a. Ram venhimna (National Security) atana pawimawh leh Sorkarin ram himna atana Dan a siam, ‘International Border atanga boruak Mel a teh a, Km 25 chinah Ministry of Defence, Govt. of India remtihna la hmasa lovin kawng thar sial, kawng chei that phal a ni lo, tih chu Champhai District chhunga Indo-Myanmar ramri-ah te zawm lova phalna nei lo leh Sorkar hriatpui lova kawng thar sial/kawng chei tha an awm tih hriat a ni a. Dan lova kawng thar sial leh kawng chei that te he Hriattirna chhuah a nih rual hian tawpsan vek tur leh sorkar laipui, Ministry of Defence remtihna tel lova kawng siam tawh lo tura hriattir kan ni. Thupek zawm lote chungah Dan anga hmalak a ni ang tih a tarlang

𝗝𝗔𝗜𝗟-𝗔𝗛 𝗛𝗨𝗡 𝗛𝗠𝗔𝗡𝗚 :
Champhai District Bodybuilding and Fitness Association (CDBFA) chuan Inrini khan District Jail tlawhin, thilpek an hlan.
District Jail tlawh leh thilpek hlanna hun hi R.Lalhmachhuana, President, CDBFA chuan kaihruaiin, Jerry P. Vanlalrinchhana, Vice President, CDBFA chuan fuihna thu sawiin - Jail tang mekte chu Jail atanga an chhuah hnuah pawh nun duhawm an la neih theih thu sawiin; a tha lam kawng zawh tur leh Jail chu a tawpna tur a ni lo tih hriat a pawimawh thu te, ruihhlo an lo tih thin leh sual kawng an lo zawh tawhte bansan a, a tha lam pan tum turin a fuih a. CDBFA chuan District Jail-a tang mekte'n hlim taka hun an hmanna tur leh an taksa an sawizawi theihna turin Football leh Volleyball pakhat ve ve an hlan a. Thilpek hi Lalremruata, Sr. Vice President, CDBFA chuan a hlan a ni.

𝗦𝗜𝗣𝗔𝗜 𝗣𝗔𝗪𝗟 𝗧𝗛𝗔𝗟𝗔𝗜𝗧𝗘𝗡 𝗙𝗔𝗜𝗡𝗔 𝗛𝗡𝗔𝗧𝗟𝗔𝗡𝗚 𝗡𝗘𝗜 :
India Eastern Territory(IEC) hnuaia Salvation thalai din champhaphak vawi 66 na, October Ni 8, 2020 lawmna kal zelah, Inrinni khan Salvation Army Youth (SAY) Vengthlang Corps, Champhai chuan faina hapta denchhenin faina hnatlang an buatsaih.
He hunah hian SAY member-te chuan, Champhai khawpui leh a chheh vela mipui vantlang len khawthawnna hmun langsar tak tak - Zote Park, Mualbuhvum leh Mualnuam hmunte an thianfai a. Hnawm hnawkte chhar faiin, UD&PA Deptt. siam bawlhhlawh bawmte an dah nghal zel a. Salvation Army Youth India Eastern Territory Rising Day pual hian Indian Eastern Territory hmun hrang hrangah vantlang tana rawngbawlna hrang hrangte thawh thin a ni.

𝗞𝗛𝗨𝗡𝗚𝗛𝗥𝗔𝗡 :
Champhai District chhunga khung hran mek mi 5-te chuan Inrinni khan inkhunghranna hmun an chhuahsan a, Inkhunghranna hmunah mi 3 an luh belh bawk.
Tun dinhmunah Champhai District chhungah inkhung hrang mi 29 an awm mek a; Sawrkar inkhunghranna hmunah mi 17 awm mekin, Covid Care Centre-a enkawl lai mi 2 an awm a; in lama inkhung hrang mi 10 awm bawkin; inkhung hrang mekte hi mipa 25 leh hmeichhia 4 an ni a.

𝗗𝗔𝗠 𝗧𝗔𝗞𝗜𝗡 𝗖𝗛𝗛𝗨𝗔𝗞 :
Zirtawpni khan Covid-19 kai enkawl lai, hnam dang mipa pakhat chuan Covid Care Centre, Nursing School Building chu dam takin a chhuahsan a. Heti hian tun dinhmunah Champhai-ah Covid-19 hri kai enkawl lai mi 3 an la awm a. Hri kai tawh zawng zawng hi mi 23 an awm tawh a, mi 21 enkawl dam an ni tawh a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…