Skip to main content

Ni 5.10.2020 (Thawhtanni)

𝗞𝗛𝗨𝗔 𝗥𝗘𝗟 𝗖𝗛𝗛𝗜𝗔𝗧𝗡𝗔 𝗧𝗛𝗟𝗘𝗡𝗚 𝗡𝗔𝗦𝗔 - 𝗕𝗗𝗢 𝗜𝗡 𝗕𝗜𝗞𝗘 𝗛𝗠𝗔𝗡𝗚𝗜𝗡 𝗞𝗔𝗪𝗡𝗚 𝗖𝗛𝗛𝗜𝗔 𝗔 𝗛𝗠𝗨𝗡𝗔𝗛 𝗘𝗡𝗙𝗜𝗔𝗛 :
Tunhnaia ruahsur nasa vangin Mizoram hmun hrang hrangah leimin leh tuilian vanga chhiatna thleng a awm nual a, vanneihthlak takin thi leh hliam hriat tur a awm lo.
Khawbungah pawh Inrinni zan dar 9 leh dar 10 vela ruah bawhawk sur leh khawpui riin lei a nghawr nasat avangin Khuangthing kawng hmun 10 velah kawngko chhak lam minin kawng a hnawh ping a.
Khawbunga lungrem chimin ar in a deng chhe vek a, khaw chhung inkalpawhna kawngko tla a awm nual a, Vaphai-a Dungtlang YMA Hall bul lungrem a chim bawk.
Khuangthing kawng hi Bialtu MLA Ramthanmawia ngenna angin PWD SDO K.Jonathan Thangmawizuala hovin nimin chawhma khan lirthei kal theihin an thian fai nghal a ni.
Tiau lui kama leilet nei, Zote khaw tractor pahnih chu Tiau lui lian hian a la a, nimin khan khawtlang hnatlanga zawn niin tractor pahnih hi hmuh a ni a, a chhe nasa dun hle a, tractor pakhat zawk hnunghnuh (trailer) chu hmuh niin, pakhat zawk hnunghnuh erawh hmuh a la ni lo niin thu dawn a ni a. 
A biala hun hmang mek Champhai
North bialtu MLA Dr. ZR Thiamsanga chuan nimin zing khan Zote hi tlawhin tractor zawng turte tan hian silpaulin pahnih leh pawisa fai a pe a.
Tun tum anga Tiau lui lian hi a la awm meuh lo niin thu dawn a ni a, Tiau lui kam ramri-a Mizoram Police duty camp eng emaw zat chu tuilian hian a chim vangin luah zui tlak a ni lo a; Tiau ral, Myanmar lama Tiau lui hnaih In pawh a chim nual a, tunah hi chuan tuilian hi a ziawm chho tan deuh tawh niin thu dawn a ni bawk.
Murlen panna kawngpui pawh leimin a awm nual bakah kawng chhuat a bal bawk a, lirthei kaltlang theih a ni lo a. Nimin khan Champhai BDO R. Lalnunkimi chuan Murlen khaw panna kawngpui chhia hi a hmunah kalin a enfiah a, motor hmanga kal theih a nih loh avangin two wheeler nen kalin BDO ho hian Murlen VC te nen enfiahin, BDO hian vawiin lamah kawng siam tha tur leh leimin thianfai tur hian Excavator a tir dawn niin thu dawn a ni a. Bulfekzawl kawngpui pawh leimin vang hian lirthei kaltlang theih a ni lo niin thu dawn a ni bawk.

𝗭𝗜𝗢𝗡 𝗩𝗘𝗡𝗚 𝗕𝗥𝗔𝗡𝗖𝗛 𝗧𝗘𝗡 𝗧𝗛𝗜𝗦𝗘𝗡 𝗣𝗘 :
Association for Voluntary Blood Donation (AVBD), Champhai leh Zion Veng Branch YMA tangkawp chuan Inrinni khan National Voluntary Blood Donation Day, 2020 pualin thisen pek hun an buatsaih.
He hun hi District Hospital, Champhai Blood Bank-ah hman niin, R. Lalchhuanawma, AVBD Vice President chuan kaihhruaiin, Kum 1975 atangin India ramah Voluntary Blood Donation Day hi hman a nih tawh thu a sawi a. October ni 1 kha National Voluntary Blood Donation Day a nih thu leh remchan zawkna avanga Inrinni khan hman a nih tak thu sawiin, he ni pual hian kum dangah pawh thisen pek thin a ni tih a sawi bawk.
Dr Zatluanga, DMS chuan Champhai District Hospital chu Mizoram District Hospital-ah a tha ber pawl a nih thu leh Specialist awm pawh a tha ber pawl a nih tawh thu sawiin, pantu pawh an pung tawh hle tih a sawi a Kum 2006 vel kha chuan thla khatah Thisen Unit 20-te hman thin a nih laiin, tunah chuan thla khat chhungin thisen unit 90 atanga 100 lai mamawh a nih tawh avangin mi thahnemngaite inpekna chu an hmachhuan ber a nih
thu a sawi a.
Kohhran leh YMA bakah, mimal leh pawl angin thisen pek thin a nih thu sawiin, thisen pek chu HIV leh Hepatitis lakah an him tih hriat theihna pawimawh tak a nih thu a sawi bawk a. Mi dangten damna an chan theihna tura thisen pek chu a hlut thu leh a ropui thu a sawi a. Thisen pek kawnga mi dangte tihhmuhtu leh an theih hun apianga thisen pek chhunzawm zel turin a sawm nghal a. Kumin January thla atanga September thla thlengin thisen unit 998 pek a ni tawh tih a tarlang bawk.
Zion Veng Branch YMA member mipa 15 leh hmeichhia 9-te’n Thisen Unit 24 an pe a ni.

𝗧𝗥𝗨𝗘𝗡𝗔𝗧 𝗞𝗛𝗔𝗪𝗟 𝗛𝗠𝗔𝗡𝗚𝗜𝗡 𝗣𝗢𝗦𝗜𝗧𝗜𝗩𝗘 𝗛𝗠𝗨𝗖𝗛𝗛𝗨𝗔𝗞 :
Champhai District chhungah Sample 2,085 endik a ni tawh a, Covid-19 hri kai mi 23 hmuhchhuah an ni tawh.
Ningani khan Champhai District Hospital TrueNat Laboratory-ah Sample 2, mipa 1 leh hmeichhia 1-te sample endik a ni a; Rapid Antigen Test hmangin Sample 4, mipa 3 leh hmeichhia 1-te sample endik a ni bawk a; an result a negative vek a. Zirtawpni khan TrueNat Laboratory-ah sample 9, mipa 8 leh hmeichhia pakhat sample endik leh niin, mipa 2, civil mi ve ve, chu Covid-19 hri an kai tih hmuhchhuah a ni a. Kum 27 leh 37-a upa, Guwahati, Assam atanga tun hnaia rawn haw, khunghranna hmuna awm lai, Covid-19 hri kai natna lang chhuak lo an ni.
Nimin thleng khan Champhai District chhunga sample endik tawh zawng
zawng atangin Covid 19 kai mi 23 hmuh chhuah a ni tawh a; Champhai District Hospital TrueNat Laboratory-ah Sample 124 endik tawh niin, Rapid Antigen Test hmangin Sample 485 endik a ni tawh a; ZMC leh Silchar-a thawn tawhte nen Champhai District chhungah Sample 2,085 endik a ni tawh a. Sample endikte hi India ram chhung state hrang hrang atanga rawn haw khawmte leh ram pawn atanga rawn haw te bakah Mizoram chhung District dang atanga rawn hawte leh
 kal chhuak tur te, Frontline Worker leh Chanchinbu mite bakah, Covid 19 kai leh kai loh mahni infiah duhte an ni.
Heti hian tun dinhmunah Champhai District chhunga Covid-19 kai tawh zawng zawng atangin mi 17 enkawl dam tawh niin, Covid Care Centre-ah mi 6 enkawl mek an ni.

𝗞𝗜𝗪𝗜 𝗖𝗛𝗜𝗡𝗚𝗧𝗨𝗧𝗘 𝗧𝗔𝗡 𝗠𝗟𝗔 𝗣𝗘𝗡𝗖𝗛𝗛𝗨𝗔𝗞 :
Khuangphah khuaa Kiwi chingtu ten Kiwi rah an thar chhuah zinga quintal 60 chu Champhai North Bialtu MLA Dr ZR Thiamsanga hmalakna-in, Sairang Cold Storage ah dahluh a ni dawn a. Kiwi hi Grade 'A' & B ah then niin, Grade A hi Kg khat Rs 120/- leh Grade B hi Kg khat Rs. 100/- a hralh thin a ni a. Kumin hian Khuangphah khua hian Kiwi hi Quintal 100 chuang zet thar tura beisei a ni tih thu kan dawng.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Champhai Police-te chuan Inrinni khan inkharkhipna dan bawhchhia, vantlang zinga hmai tuam lo mi 3 an man a. Hemi ni ve hian Khawzawl Police te chuan vantlang zinga hmai tuam lo mi 6 an man bawk. Inrinni khan Mizoram pumah inkharkhipna dan bawhchhia mi 246 man an ni a, an pawisa chawi hi a vaiin Rs. 33,300 a ni a. Inrinni thlenga Mizoram puma inkharkhipna dan bawhchhia man hi mi 43,889 tling tawhin an pawisa chawi hi a vaiin Rs. 80,01,400 a tling tawh bawk.

𝗟𝗘𝗜𝗠𝗜𝗡 𝗧𝗛𝗜𝗔𝗡𝗙𝗔𝗜 :
Nimin zing khan Champhai Kanan veng Nikang luh dawnah Leimin vangin motor lian kaltlang theih a ni lo a, lirthei te chi chauh a kaltlang thei a, nimin khan thenfai a ni tih thu kan dawng.

𝗞𝗛𝗨𝗡𝗚𝗛𝗥𝗔𝗡 𝗭𝗔𝗧 :
Champhai District-ah mi 28 khung hran mek an ni.
DPRC Institutional Quarantine Centre-ah mipa 6 khung hran mek an ni a. Inrinni khan mipa 7 leh hmeichhia 3 an chhuak a, mipa 2 CCC-ah sawn niin, mipa 2 an luh belh leh thung a. Tourist Lodge Institutional Quarantine Centre-ah mi 14, mipa 10 leh hmrichhia 4 khung hran mek niin, mahni ina inkhung hrang mipa 2 an awm bawkin; Covid Care Centre, Nursing School Building-ah mipa 6 enkawl mek an ni bawk a. Champhai District-a khung hran mekte hi mipa 24 leh hmeichhia 4 an ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…