Skip to main content

Ni 7.10.2020 (Nilaini)

𝗥𝗔𝗡 𝗞𝗛𝗨𝗔𝗛𝗞𝗛𝗜𝗥𝗛𝗡𝗔𝗧𝗛𝗨𝗣𝗘𝗞 𝗖𝗛𝗛𝗨𝗔𝗛 :
Champhai District chhungah Ran khuahkhirh loh a tam hle a, Ran khuahkhirh loh hi mipui tan a him loh bakah kawng hrang hrang in a hnawk sak in mihring hriselna atan pawh a tha lo hle a. Champhai District a lo thianghlimna tur te, mipuite himna leh hriselna atan Ran khuahkhirh a tul avangin Maria CT Zuali, Magistrate Champhai District chuan Sec.144 CrPe 1973(Act-II of 1973) in thuneihna a pek angin thupek hetiang hian a chhuah. 
1) A neitu venna tel lovin eng ran mah an mahni a chhuah tirhlat tir phal a ni la.
2) Ran neltu in a ran vulh vantlang hmun emaw midang ramah a chhuah tur a nl la.
3) Ui reng reng a vulhtuten an kai a nih loh chuan pawn chhuah tir loh tur a ni
4) Mahni ran vulh in khawlai emaw vantlang hmun a ti bawlhhlawh a nih chuan a neituten an thianfai tur a ni
Thupek zawm lote chu Section 188 IPC hmangin hrem an ni ang. Thupek hi chhuah a nih atanga thla hnih chhung a huam dawn a ni. 

𝗞𝗛𝗨𝗔𝗡𝗚𝗧𝗛𝗜𝗡𝗚 𝗞𝗛𝗨𝗔 𝗜𝗡 𝗛𝗔𝗥𝗦𝗔𝗧𝗡𝗔 𝗧𝗔𝗪𝗞 :
Tun hnaia ruah sur nasa avangin Khuangthing khua chuan buaina an tawh nasat phah hle.
Ruah sur nasa avang hian Khuangthing khuaa Pu Laldinmawia in bul chu hlauhawm khawpin a khik belh zel a. Khuangthing VDMC hruaitute chuan lei hi a khik belh zel a nih chuan kawngpui chawpa bal vek thei a nih avangin Sawrkar thuneitute'n enfiah thei se an duh thu an sawi a ni. Hetih rual hian Khuangthing khaw Leilet, Chhungkaw 13-te enkawl lai chu tuilian leh Sabereka-khuangkaih chuan a tichhia a. Chhungkaw thenkhat tuikawng leh leilet bialte chu tuilian hian a lak sak nasa hle a. Pu Lalrammuana leileta a buh chu tuilian hian a laksak deuh vek bawk.
Khuangthing-a leilet neitute chuan, Tlawva Zau atang hian Kum tin buh tin 3,650 vel an thar chhuah ziah thin thu leh Kuminah erawhchuan khuarel Chhiatna vangin buh Tin 1,150 vel thar theihna leilet chu tuilian hian a tih chhiatsak ngei an rin avangin kum dang aia buh an thar tlem zawk tur thu an sawi a. Tunah hian Tlawva lui an kaina ber lei pahnih chu tuilian hian a lak sak ve ve avangin leilet neitute chuan harsatna an tawh phah thu an sawi bawk a. Hengte bakah hian Tlawva kam hnaiha Sahnga Dil-te chu tuilian hian a tihchhiat sak vek bakah an Sangha chawpin a laksak vek thu an sawi a.
East Tuipui bialtu MLA, Ramthanmawia leh District Bawrhsap, Maria CT Zuali-te chuan sawrkar atanga khuarel chhiatna atana tanpuina awm thei angte ngaihtuahsak an tum thu leilet neitute chuan an sawi bawk.

𝗖𝗛𝗔𝗠𝗣𝗛𝗔𝗜 𝗛𝗠𝗔𝗦𝗔𝗪𝗡𝗡𝗔 𝗧𝗨𝗥𝗜𝗡 𝗥𝗔𝗪𝗧𝗡𝗔 𝗧𝗛𝗟𝗘𝗡 𝗧𝗛𝗘𝗜𝗛 :
Nimin khan Champhai District NGO Co-Ordination Committee chu thukhawm in, thuchhuah an siam.
NGO Co-Ordination Committee chuan, Champhai-in hriatrengna lungphun a neih : Centenary Lungphun, District Headquarters Lungphun leh Chief Minister, Zoramthanga chawimawina Lungphun te chu chei that leh tuai hnum a, humhalh an tum a. Heng hmalak an tumnaah hian mipuite'n tawiawm turin an ngen a.
Nimin thutkhawmah hian Champhai District leh Champhai khawpui hmasawnna atana hmalakna tur rawtna hrang hrang 38 lutte an sawi ho hnuah, rawtna 25-te chu Executive Meeting hmasa berah thlir ho turin an dah a. NGO Co-Ordination Office - LR Enterprise, Champhai Vengthlang-ah a duh apiang tan Chairman emaw Secretary emaw Address-in, Rawtna leh Selna pek theih reng a ni tih an thuchhuahah hian an tarlang bawk.

𝗗𝗔𝗠 𝗧𝗔𝗞𝗜𝗡 𝗖𝗖𝗖 𝗠𝗔𝗡𝗚𝗧𝗛𝗔 :
Nimin khan Mizoramah hri kai 50 enkawl damte chu chhuahtir an ni a. Nimin chawhnu khan Champhai-a Covid-19 hri kai enkawl lai - hnamdang mipa 2, kum 25 leh 34 mite chuan Covid Care Centre, Nursing School Building chu dam takin an chhuahsan a. Champhai District-ah Covid-19 hri kai tawh zawng zawng hi mi 23 an awm tawh a; mi 19 enkawl dam an ni tawh a, mi 4 enkawl lai an la awm mek a ni.

𝗚𝗔𝗦 𝗗𝗢𝗨𝗕𝗟𝗘 𝗧𝗛𝗘𝗜𝗛 :
Gas double theih MIZOFED Gas Agency Champhai-a kum 2019 hma lam a Gas Connection nei, Cylinder Double lohte tan tun thla ni 25 hmain double theih a ni a. Gas Double turte chuan : Gas Consumer Card, Subscription Voucher (SV), Voter ID xerox 1, Aadhaar Card xerox 1 leh pawisa, Cheng 2,150 ken tur a ni. Gas double hian PMUY Free Connection-te chu a huam rih lo ang.

𝗙𝗔𝗜𝗡𝗔 𝗛𝗡𝗔𝗧𝗟𝗔𝗡𝗚 :
District Level Centre for Women Mahila Shakti Kendra, Champhai huaihawtin nimin khan Vengthar Tlangnuam-ah faina hapta pualin ‘Social Work’ neih a ni a, khawlai tih fai bakah, khawtlang mipui te faina kawnga zirtirna pek an ni.
Nimina fai inzirtirna hun hi Women Welfare Officer, K.Lalrinfimi chuan a kaihruai a mipui te chu bawhhlawh paih kawnga fimkhur tura chahin, faina kawnga mawhphurhtu chu keimahni theuh hi kan ni, a ti a. Hun lo kal zel turah pawh faina ngai pawimawh deuh deuh turin mipui kalkhawmte chu a chah bawk.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Champhai Police-te chuan Thawhtanni khan inkharkhipna dan bawhchhia, vantlang zinga hmai tuam lo mi 9 leh curfew laia lirthei tlan chhuak pakhat an man. 

𝗞𝗛𝗨𝗡𝗚𝗛𝗥𝗔𝗡 𝗭𝗔𝗧 :
Nimin khan mi 5-in inkhung hranna hmun an chhuahsan a, Champhai District chhunga inkhunghranna hmunah mi 24 an awm mek.
Tun dinhmunah DPRC Institutional Quarantine Centre-ah mipa 4 khung hran mek an ni a; Tourist Lodge Institutional Quarantine Centre-ah mi 15, mipa 10 leh hmeichhia 5-te khung hran mek niin, mahni ina inkhung hrang mipa 1 a awm bawk a. Covid Care Centre, Nursing School Building-ah mipa awm 6 zinga 2 nimin khan hri kai enkawl dam chhuahtir an ni a, mipa 4 enkawl mek an ni bawk a. Khung hran mekte hi mipa 19 leh hmeichhia 5 an ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…