Skip to main content

Ni 9.10.2020 (Zirtawpni)

𝗕𝗔𝗪𝗥𝗛𝗦𝗔𝗣 𝗛𝗢𝗜𝗡 𝗕𝗢𝗥𝗨𝗔𝗞 𝗧𝗜𝗛 𝗧𝗛𝗜𝗔𝗡𝗚𝗛𝗟𝗜𝗠 𝗟𝗘𝗛 𝗕𝗔𝗪𝗟𝗛𝗛𝗟𝗔𝗪𝗛 𝗦𝗔𝗪𝗡𝗚𝗕𝗔𝗪𝗟 𝗗𝗔𝗡 𝗧𝗨𝗥 𝗦𝗔𝗪𝗜𝗛𝗢 :
 National Green Tribunal-in District  tina  Environment  Plan  mumal  tak  siam  tura  a  tih angin nimin khan Champhai District Level Committee on Environment Plan chu Bawrhsap Maria CT Zuali hovin DC Conference Hall-ah an thukhawm.
Bawrhsap, Maria CT Zuali chuan bawlhhlawh siam thei  hrang  hrangte  laka Champhai District a lo fihlim zawk nan leh hriselna kawnga hmasawn  theihna  turin  District  Environment  Plan mumal tak neih a tul tih a sawi a. District Environment Plan duan chhin a nih thu sawiin, duan  fel  a  nih  theihna turin belh leh paih ngaite ngun taka thlir  a,  infinchhuah  kawnga theihtawp chhuah turin kalkhawmte chu a sawm a.
He  huna  thukhawmchuan Central Pollution Control Board dung zuia siam - Champhai District tana Environment Plan duan chhin chu thlir hovin, belh leh paih ngai awmte zirchian a nih hnuah siam rem a ni a. Mipui hnenah peih fel a nih hunah zau zawka zirtir hna kalpui ni se tih a ni bawk.  Hnawmhnawk  leh boruak  ti  bawlhhlawh  thei hrang hrangte chhui chian a, chin  fel  leh  enkawl  zui  dan turte sawi ho a ni bawk a. Plastic,  insak  leh  thiahna  chak hrang hrang te; Damdawi in, Clinic leh Laboratory hnawm te, mihring tana hlauhawm bik hnawm te, electronics bungraw hlui leh chhiate thliar hranga hnawksak  lova chin  fel  dan turte rel a ni a. Tui thianghlim vawn  him  te,  tuichhe  paih mumal taka sawngbawla hman tangkai  a  nih  dan  turte ruahmanna siam a ni a.
Heng bakah hian boruak thianghlim vawn him te, lung leh balu lakna chungchang leh ri bengchheng siam thei hrang hrang  ven  dan  tur chungchangte pawh sawi ho a ni a; hmalakna tur leh hma la turte ruat nghal an ni bawk.

𝗖𝗛𝗔𝗡𝗘𝗠 𝗖𝗛𝗨𝗡𝗚𝗖𝗛𝗔𝗡𝗚 𝗡𝗚𝗔𝗜𝗛𝗧𝗨𝗔𝗛 :
Nimin chawhma khan Champhai New Market (CHANEM) enkawl chungchanga mawh phurtu - CHANEM Management Authority chu Chairman, Maria  CT  Zuali,  District Bawrhsap hovin DC Conference Hall-ah an thu khawm.
Bawrhsap  chuan Champhai  khawpui  hmel lanna langsar tak CHANEM Building chu neitu thinlung pu-a uluk taka enkawl a ngai tih sawiin, Building thawm that ngai laite thawm tha chung zela faina, thianghlimna leh venhimna kawngah entawn tlak taka siam tum a nih thu a sawi  a.  He  hunah  hian CHANEM Building enkawl kawnga  hmalakna  hrang hrangte  sawi  ho  a  ni  a. Thukhawm chuan Management Authority chu mumal zawka kalpui a, hun bi neia thutkhawm thin ni se; Balance  Sheet  mumal  zawk siam a, report leh return-te a hun bi ang zelin Firms & Society lamah theh luh thin ni se, an ti a. Thawmthat ngai hrang hrangte sawi ho niin, senso ngaite sawi ho a nih hnuah  pawm  a  ni  a. CHANEM  luhna  kawng remchang leh traffic tibuai lo deuh zawk siam a nih theihna tur chungchang pawh sawi ho a ni a. Line department-te'n en ho a, ruahmanna siam ni se, an ti a. Heng bakah hian faina leh thianghlimna kawnga CHANEM Building tih hmasawn dan tur leh a chheh vel cheimawi dan turte sawi ho a ni bawk.
Hetihlai hian Champhai Vengthlang huamchhunga Tlawmngai Pawl hrang hrang in hmukhawm chuan CHANEM hmun District Court, Champhai atana hman hawh tir tura Sawrkarin ruahmanna a siam chu an duh loh thu Sawrkarah thlen nise an ti.

𝗘𝗟𝗘𝗖𝗧𝗥𝗢𝗡𝗜𝗖 𝗩𝗔𝗖𝗖𝗜𝗡𝗘 𝗖𝗛𝗨𝗡𝗚𝗖𝗛𝗔𝗡𝗚 𝗭𝗜𝗥𝗛𝗢 :
Nimin khan Electronic Vaccine  Intelligence  Network chungchang Champhai-ah zir ho a ni.
Electronic Vaccine Intelligence Network hi Ministry of Health & Family Welfare leh UNDP hmalakna, India rama  Vaccine  leh  Logistic Management Digitalize-na tur Application a ni a. Tunah hian India ram chhungah State 29 in  an  hmang  tawh  a. Mizoram-ah pawh October thla ral hma ngeia hman a nih theihna turin District tinah EVIN Mizoram buatsaihin a hman dan tur zirtirna pek mek a ni a. Ni 2 awh tur inzirtirna, I&PR  Conference  Hall, CHANEM Building-a neih hi Dr R. Lianmawia,  Chief Medical Officer Champhai leh DIO, Dr Zodingliana ten an telpui a ni.
He inzirtirna, CCH-te tana  buatsaihah  hian Zohlupuii, Sr. Project Officer,  EVIN  Mizoram; Lalhmingsanga, Project Officer, Lunglei Region; Emily Malsawmtluangi,  Project Officer, Aizawl  Region; Albert Lalzikpuia, Vaccine and Cold Chain Manager, Champhai  District  leh  F. Vanlalhmangaihsangi, Vaccine and Cold Chain Manager, Aizawl West District- te'n kalkhawmte zirtirna an pe a; he inzirtirna hi vawiinah zawh fel a ni ang.

𝗖𝗢𝗟𝗟𝗘𝗚𝗘 𝗭𝗜𝗥𝗧𝗜𝗥𝗧𝗨 𝗜𝗡𝗗𝗔𝗜𝗛𝗟𝗢𝗛 𝗖𝗛𝗨𝗡𝗚𝗖𝗛𝗔𝗡𝗚 𝗦𝗔𝗪𝗜𝗛𝗢 :
MZP Headquarters Champhai hmalakna tur relin Executive Committee an thukhawm.
He  hun  hi  President, H. Lalramhlunan a kaihruai a; MZP  hmalakna  tur  hrang hrangte leh MZP rorelna sangber dawttu - Federal Council Agenda turte sawi ho a ni a. Govt. Champhai College-a zirtirtu  indaih  lohna chungchang te, Career Guidance  neih  chungchang  te, Champhai-a B. Ed zirna nei tura  hmalak  dan  tur chungchang te, Scholarship buaipui dan tur te, Champhai-a  zirna  in  hrang  hranga zirtirtu  indaih  lohna chungchang te, Polytechnic Building a nihna tur ang taka hman  a  nih  theih  nana hmalak dan tur chungchang te, Champhai leh Khawzawl inkar  kawng chungchang te leh Hnam lam intihsiakna neih chungchang te ngaihtuah a ni a. Hnam lam intihsiakna hi  Covid-19  boruak  thlir chungin Sawrkar-in School pangngai taka a hawn veleh High School chin chung lam tan  buatsaih  tura  rel  a  ni bawk.

𝗗𝗢𝗖𝗧𝗢𝗥 𝗗𝗔𝗛 𝗔𝗩𝗔𝗡𝗚𝗜𝗡 𝗟𝗔𝗪𝗠 :
Chief  Minister Zoramthanga, Health Minister Dr. R.Lalthangliana leh  East Tuipui bialtu MLA Ramthanmawia te hmalakna zarah Sesih PHC-ah Doctor dah thar a ni ta chu an lawm hle tih Sesih VC chuan thuchhuah siamin an tarlang.

𝗕𝗔𝗪𝗥𝗛𝗦𝗔𝗣 𝗜𝗡 𝗠𝗘𝗜 𝗘𝗡𝗚 𝗦𝗜𝗔𝗠𝗡𝗔 𝗞𝗛𝗔𝗪𝗟 𝗣𝗘 :
Champhai District Bawrhsap Maria CT Zuali chuan Hnahlan PHC tan Generator a pe a, Hnahlan PHC Medical Officer leh Staff te an lawm hle. Bawrhsap hian Zokhawthar Screening Centre tan Steel Almira, dawhkan leh thutthlengsei a pe tih thu kan dawng bawk.

𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 𝗟𝗘𝗛 𝗞𝗛𝗨𝗡𝗚𝗛𝗥𝗔𝗡 :
Champhai District chhunga inkhunghranna hmunah mi 28, mipa 27 leh hmeichhia 1 an awm mek.
DPRC Institutional Quarantine Centre-ah mipa 1 luh belh lehin, tunah hian mipa 5 khung hran mek an ni a. Tourist Lodge Institutional Quarantine Centre-ah mi 9, mipa 8 leh hmeichhia 1 khung hran mekniin, mahni ina inkhung hrang mipa 10 an awm bawk a. Covid Care Centre, Nursing School Building- ah mipa 4 enkawl mek an ni bawk.
Champhai Police-te chuan Nilaini khan inkharkhipna dan bawhchhia, vantlang zinga hmai tuam lo mi 7 an man a. 

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…